Cuenca Azul proposa candidatos a o Consello de l’Augua de l’Ebro

Iste sabado pasau se reunió l’asambleya de Cuenca Azul, Ret d’organizacions d’esfensa d’os ríos y o territorio de toda a cuenca de l’Ebro. L’obchectivo yera ratificar a propuesta de candidatos a vocals a o Consello de l’Augua d’a Demarcación que s’habría de constituir l’1 de febrero. Os 2 candidatos a vocals y os suyos 2 suplents formarán un equipo componiu por Susana Abella d’a Plataforma en Esfensa de l’Ebre, Julián Ezquerra de COAGRET, Quím Perez d’Ecolochistas en Acción y Luis Tirado de SEOBirdLife.

42 organizacions, d’ambito espanyol, autonomico u local de toda a cuenca, emparan ista propuesta. A intinción, amás d’estar a voz critica en ixe organo suposadament “de participación” d’a Confederación Hidrografica, formau por 86 personas (a mayoría representants de l’administración, autonomías y usuarios agricolas) será a de fer-lo transparent. O compromiso d’os miembros ye que toda a información que se faiga en ixe organo opaco se difunda ent’a sociedat, y simultaniament que as propuestas d’as organizacions socials d’afectaus y ecolochistas puedan plegar a iste organo de decisión en a CHE.

En l’Asambleya se charró tamién de prochectos ta iste anyo que prencipiamos. Entre ells se troban as accions contra os procesos privatizadors de l’augua, que tornan con fuerza tanto en as ciudatz como en o campo, y unas chornadas ta informar a la resta d’a cuenca d’a fuerte oposición d’os agricultors de Tierra Estella (Navarra) a la transformación en regadío d’o suyo territorio; como eixemplo d’a insostenibilidat d’os nuevos regadíos que se quieren implantar en a cuenca de l’Ebro.

O ret Cuenca Azul constato de traza preocupant o retardo en a elaboración y presentación a información publica d’o Plan de Cuenca de l’Ebro en l’anterior lechislatura, y isto puede fer que en a present lechislatura sía substituiu iste borrador de Plan por unatro, que puestar que siga mas dificil que incluiga medidas eficaces ta aconseguir os obchectivos d’a Directiva Marco de l’Augua (o buen estau d’os ríos y lagos). Dende o ret temen que aquellas medidas con as quals no son d’alcuerdo, y que suposarían a defunción d’os ríos d’a cuenca de l’Ebro, como son a construcción de entibos y trescoles, sían las achugas de l’actual equipo de gubierno estatal.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.