Dandaleyos d’o PP cuanto a o trascole

O trascole de l'Ebro dentra en campanya dimpués d'as declaracions d'Esteban Pons

Gonzalez Pons (foto: PP Castiella y Lión)A postura d’o PP cuanto a o trascole de auguas de l’Ebro enta atros territorios contina sin estar platera de tot. L’empandullo empecipió con unas declaracions de Esteban González Pons, Vicesecretario Cheneral d’o PP, dicindo que en que plegase Rajoy ent’a Moncloa se recuperaría o PHN (Plan Hidrolochico Nacional) a on que yera o trascole.

Ahiere Bermúdez de Castro, tamién d’o PP y Conseller de Presidencia d’o Gubierno d’Aragón, declaró que “podemos estar-nos tranquilos, o Plan Hidrolochico no será en o programa electoral d’o PP”. Seguntes ell, s’ha contrimostrau que o trascole “no ye sostenible ni economicament ni meyoambiental”. Tamién remeró una entrevista de Mariano Rajoy a on declaraba que o PP no levaría o trascole en o programa electoral suyo.

Manimenos, dende Murcia y Valencia, o PP esfendió o PHN y que se tornase a incluyir en o programa d’o partiu t’as eleccions espanyolas. José Antonio Ruiz Vivo, portavoz d’o PP d’a Rechión de Murcia, se concaró con Bermúdez de Castro, decindo-le que as suyas parolas “amuestran prou desprecio a os suyos companyers de Murcia, Valencia y Almería” y le remeró que Rajoy estió ministro d’Aznar quan se fació o PHN. Tamién o president d’a Comunidat Valenciana, Alberto Fabra, esfendió o trascole y aseguró que no renunciará a desichir “lo que a los ciudadanos les cal ta estar una rechión potent, prospera y que chenere treballo”.

PSOE y CHA ha desichiu que a D.Ch.A. faiga esclatera a suya postura cuanto a o trascole. Pilar Alegría, candidata a o congreso por o PSOE demandó una rectificación “publcia, esclatera y contundent” de Mariano Rajoy y Luisa Fernanda Rudi sobre o trascole. Joaquín Palacín, portavoz de meyoambient de CHA crei que “o PP no renunciará a levar o trascole de l’Ebro encara que as suyas intruccions sigan negar-lo en Aragón” y que no sirve ta cosa que o PAR (contrario a o trascole) haiga pactau con o PP”. Alfredo Boné, portavoz d’o PAR, estió menos alticamau remerando que en l’alcuerdo de gobernabilidat con o PP “apuestan por a unidat de cuenca”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.