De l’Hamburgo de St. Pauli a qualsiquier vico de l’Estau espanyol #Gefahrengebiet

Chuserra Barrios

HamburgoNo querría fer un analís d’a situación d’a politica alemana, estoi que muitos lo pueden fer millor que no yo. Somos d’alcuerdo en que as zagueras eleccions y pactos UCD-SPD han puesto influyir en as intencions de desaloix d’o centro social okupau “Rote Flora”, entre os vicos de St. Pauli y Altona d’Hamburgo, y os violentos incidents que i han provocau.

Dimpués de bells tres diyas arredol d’as carreras d’Hamburgo, me veigo obligau a planteyar una serie de conclusions y analisis.

Partimos d’una ciudat muit peculiar, aon que as carreras que veyoron naixer a Angela Merkel y cuna d’os mayors millonarios alemans se troban a’l canto d’os inconformistas y obreros vicos de Altona y St. Pauli. Iste zaguero, mitico por a suya ubicación a’l canto d’o gran puerto d’Hamburgo, pleno de prostibulos y con un centenario equipo de fútbol que fa buena uembra a l’oficialista Hamburg S.V, con una hinchada d’alcuerdo con o suyo vico.

Una d’as milentas d’experiencias que me han trucau o ficacio mientres istos tres diyas ha puesto estar, por eix., a convivencia en as puertas d’a comisaría de St.Pauli, entre manifestants, policía y prostitutas en busca de clients. En bell meyo d’una zona clamada “Gefahrengebiet” (periglosa) no he puesto veyer nian un treballador que haiga habiu de modificar o suyo camín, ni una carrera tallada, nian un control difuera de puesto,…

Con isto no quiero dicir que a situación haiga estau bien levada, ni que as protestas sigan infundadas. Pero pa un ciudadano i feito con masiada facilidat a l’estau policial con que se vive en l’Estau espanyol, lo visto no provoca que contimparación entre as dos reyalidatz.

Os ciudadanos que hemos viviu una Expo’08 de controls contino; creiximiento d’una plantilla de policía municipal plena de bambosos perfils, y mesmo a creyación d’un cuerpo antidisturbios en ista; os sucesivos barucosos desaloixos d’as casas okupadas en Zaragoza; a entrada violenta en as tierras d’entibos a expropiar; … identificacions inchustificadas y bases de datos negras amagadas, que surten enta luz en pinyoras, por criticar l’izau d’o tercer sinyal d’Espanya en Zaragoza en menos de 4 anyos.

 Situacions no menos antidemocraticas que as vividas en Catalunya con os incontrolaus y violentos Mossos d’Escuadra, u as situacions d’extrema excepción vividas contino en o País Vasco, do un 95% d’os bells 30.000 detenius entre a democracia habrían de quedar libres sin cargos en qualsiquier Estau democratico. Manimenos en l’Estau espanyol gosa estar de bell 70%. Por no charrar d’as torturas continas en comisarías, admitidas mesmo por l’actual alcalde de Zaragoza J.A.Belloch y exministro de chusticia espanyol.

 Difuera de consideracions supraoficials, sobre si a ONU ye cusirando istas intervencions, por a excepcionalidat d’un exercito y fuerzas de l’Estau alemán controladas dende dimpués d’a II Guerra Mundial. U talment pensando en que a rispuesta obtenida en as carreras d’Hamburgo dimpués d’a manifestación d’o 21 d’aviento en “Rote Flora” haiga feito retacular a o gubierno de SPD en Hamburgo.

 Torno a reflexionar en a endrecera que ye prenendo l’Estau espanyol. Con una lei de seguridat ciudadana (11/2013) recient aprebada por o PP, con una ordenanza civica aprobada en Ayto. de Zaragoza (2008) en l’anterior lechislatura y modificada (2013), u con os recients acontecimientos en as detencios d’abogaus en País Vasco y posterior meyatización d’un conflicto ya superau.

“Rota Flora”  contina en piet a tot trance, os furgons de policía pasando por a suya puerta sin aturar son o millor sinyal de pseudo-normalidat. Tot veyendo a os chovens d’Hamburgo limpio chilar contino, contra as midas represivas y o desaloix d’o centro. Mientres, os vagabundos, allenos a las barallas, duermen en a puerta d’o viello teyatro “Flora”, refusaus por un gubierno alemán más feito en atros afers, en una ciudat muit especial, aon que por cierto, as bicis circulan por dencima d’as aceras.

Una rispuesta a De l’Hamburgo de St. Pauli a qualsiquier vico de l’Estau espanyol #Gefahrengebiet

  1. Pingback: De l’Hamburgo de St. Pauli a qualsiquier vico de l’Estau espanyol #Gefahrengebiet | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.