Decenas de muertos en un accident de tren amán de Sant Chaime de Compostela

O descarrilamiento d'un tren en Sant Chaime de Compostela causa a lo menos 35 muertos y una cinqüentena de ferius. L'exceso de velocidat, a hipotesi mas probable de l'accident

estacion tren compostela

Personas acudindo a la estacion de Compostela dimpués de l’accident. Foto: Virginia Uzal (CC-BY-SA)

Un tren Alvia de larga distancia que feba o recorriu entre Madrit y Ferrol ha descarrilau en a parroquia d’Angrois, amán de Sant Chaime de Compostela, quedando uns 13 vagons vulcaus en as vías, 4 d’ells ardendo. A lo menos i hai 79 personas muertas y uns 150 ferius, 30 d’ells en estau muit grau, seguntes comunica a Xunta de Galicia. En o tren viachaban unas 240 personas. O siniestro s’ha produciu arredol d’as 20:40 h. d’iste mierques. Os equipos d’emerchencias dan por finalizau o rescate de supervivients.

Se contina investigando as causas de l’accident pero o tren podría haber iu a gran velocidat (220 km/h.) quan a muga en ixe tramo yera de 80 km/h, descarrilando en a entrada a Sant Chaime de Compostela, en una curva d’a vía d’a linia d’alta velocidat Ourense-Sant Chaime, de construcción recient. Os sistemas de seguridat podrían haber fallau.

Os vagons han dau vueltas de campana tot descarrilando. Manimenos os vecins han informau a Europa Press d’haber ascuitau bella esclatada, encara que os viachers lo niegan. Manimenos, os viachers debiu a la insonorización d’os vagons podrían no haber-la ascuitada en estar por difuera. A hipotesi d’un atentau ha estau descartada por o Ministerio de l’Interior espanyol. O tren, un Alvia serie 730, ye un d’os modelos mas modernos de Renfe, podendo plegar dica os 250 km/h. Ye o primer accident en una vía d’alta velocidat en l’Estau espanyol y un d’os accidents ferroviarios mas graus que se recordan.

T’o puesto de l’accident s’ha trasladau a escape efectivos d’a Policía Nacional espanyola, asinas como Policía local, bombers y ambulacias. Dende os hespitals han feito un clamamiento pa que done sangre a población, encara que en istes momentos en tienen prou. Se i desplaza miembros d’o Gubierno de Galicia, o Delegau d’o Gubierno espanyol y l’alcalde de Sant Chaime de Compostela. Mariano Rajoy ya ha plegau en a capital gallega pa conoixer a evolución d’os feitos.

Hue, diya de Sant Chaime Apostol, se suspenden os actos festivos en a capital gallega, asinas como os actos d’as diversas organizacions politicas. O gubierno ha habilitau un telefono especial d’atención a os familiars d’as victimas (981 551 100).

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.