Deciueito personas detenidas en una redada d’a Guardia Civil contra Herrira

En una graniza operación policial ordenada por l'Audiencia Nacional, deciueito personas d'o colectivo vasco Herrira han estau detenidas acusadas de colaborar con ETA

Momento d'a detención d'Imanol Karrera en Huarte. Foto: @KEPASESMA

Momento d’a detención d’Imanol Karrera en Huarte. Foto: @KEPASESMA

Iste maitín, a Guardia Civil espanyola ha realizau una redada contra o colectivo de refirme a las presas y presos vascos Herrira por orden d’o Chudgau d’instrucción numero 6 de l’Audiencia Nacional d’o chuez Eloy Velasco. O cuerpo militar ha acudiu, entre atros puestos, t’as siedes d’Herrira d’Hernani, Bilbau, Vitoria y Pamplona do s’ha deteniu a deciueito personas con acusacions d’enaltecimiento d’o terrorismo, integración y financiación a banda armada. L’Audiencia Nacional ha ordenau o zarre d’as siedes y o bloqueu d’as cuentas bancarias. Amás s’ha ordenau zarrar 32 perfils de Twitter, 125 de Facebook y 38 pachinas web.

O Ministerio de l’Interior espanyol afirma que Herrira ye “a organización proxima a la banda terrorista con mayor capacidad de movilización y activación social” y que “ha asumiu, de traza integral y publica, os obchectivos, estructura, funcions, metodos y procedimientos de financiación, iconografía y entramau comunicativo que historicamente desembolicaban Gestoras Pro Amnistía/Askatasuna“.

Nagore García, Manu Ugartemendia, Jon Garay, Sergio Labayen, Eneko Villegas, Roberto Noval, Ibon Meñika, José Antonio Fernández, Oscar Sánchez y Jesús Mari Aldunberri son os nombres d’as personas detenidas en Hernani, que se troban en situación comunicada, seguntes informa Naiz. En Andoain ha estau deteniu Ekain Zubizarreta por achents d’incognito mientres saliba de casa suya. Imanol Karrera ha estau deteniu en Uharte, Amaia Esnal en Sant Sebastián, Eneko Ibarguren en Azpeitia, Ana Zelaia en Vitoria y una persona que se desconoixe a suya identidat en Lizartza. Tamién s’ha apresau a Beñat Zarrabeitia, Gorka González y Francisco Javier Balda.

A Guardia Civil, con refirme d’a Ertzaintza, han acordonau os arredols d’as siedes d’Herrira y han desplagau un granizo dispositivo policial. Cients de personas han acudiu a las diferents siedes a amostrar o suyo refirme a Herrira y a las detenidas sin que bi haiga habiu incidents. En tot o País Vasco s’han convocau concentracions de protesta.

Fernández Díaz, ministro de l’Interior espanyol, considera a Herrira “un tentaclo d’ETA” y ha deixau claro que “no va a negociar con ETA” y que continará actuando “dica que ETA se disuelva“.

Dende o Gubierno vasco consideran ista operación “un trango ta zaga” y consideran que “no veyemos que aquí se siga treballando seriament enta un scenario de consolidación d’a paz“.

Dende EH Bildu han declarau que buscarán “una respuesta como pueblo d’a grandaria d’a enrestida que s’ha produciu hue” y se reunirán con toda mena d’achents socials y politicas pa veyer qué midas adoptar. Consideran que “se pretende criminalizar una demanda creixient a favor d’os dreitos d’os presos“.

En Aragón, Puyalón de Cuchas s’ha pronunciau respective a ista actuación policial amostrando o suyo total refuse y a suya solidaridat con as personas detenidas. En un comunicau declaran que “o Estau espanyol torna a fer notar a suya febleza pa acabar con as conseqüencias d’o conflicto politico dimpués d’a fin d’a luita armada decretada por ETA y seguir vías democraticas“.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.