Demandan a o gubierno balear a radiz d’a muerte d’un choven que no estió atendiu porque no teneba tarcheta sanitaria

MÉS afirma que l’executivo ye responsable politico d'a muerte d'o choven senegalés Alpha Pam por tuberculosi

immigrantA coalición MÉS por Mallorca anunció ahiere viernes que presentará una demanda penal por denegación d’auxilio a o choven senegalés Alpha Pam, de 28 anyos y resident en Can Picafort, que morió o día 21 d’abril en casa suya como conseqüencia d’una tuberculosi que no estió tractada. O choven acudió a l’hespital d’Inca, pero no se le facioron as prebas pertinents por o feito de no tener a tarcheta sanitaria. Morió solenco, sin asistencia sanitaria.

A deputada Fina Santiago afirma que o Gubierno ye ‘responsable politico d’ista muerte‘, y demanda a dimisión d’o consellero de Salut, Martí Sansaloni. Recuerda que ya se le heba advertiu que pasaría una situación como ista, y ell lo negó. Amás, os servicios churidicos d’a coalición son parando una demanda penal contra o Gubierno por denegación d’auxilio, que presentarán os venients días debant d’as instancias chudicials.

Antiparti, Santiago exiche que totz os ciudadanos d’iste país tiengan tarcheta sanitaria, ta guaranciar l’asistencia sanitaria universal y ta controlar a salut publica. ‘Somos una d’as rechions europeas con renta per capita mas alta, una d’as potencias turisticas internacionals, una persona ha muerto en casa suya solenco de tuberculosi porque se le denegó l’asistencia sanitaria. Ye una autentica vergüenya, y isto no puede tornar a pasar. Qué pre tien a vida t’o Gubierno d’o sinyor Bauzá? Somos de raso indignaus’, ha dito.

Cal recordar que l’1 de setiembre de 2012 o Gubierno espanyol retiró a tarcheta sanitaria a todas as personas en situación administrativa no regularizada. Bellas Comunidatz Autonomas decidioron mantener a cobertura sanitaria con caracter universal y en esfensa d’a salut publica de toda a ciudadanalla. O Gubierno Bauzá retiró a tarcheta sanitaria a las personas sin permiso de residencia.

Santiago recuerda que o Grupo MÉS ha proposau ‘diferents iniciativas ta mantener a tarcheta sanitaria a istos colectivos, y que o PP i ha votau en contra sistematicament’.

Fuent: http://www.vilaweb.cat/noticia/4111616/20130503/demanden-govern-haver-negat-lauxili-jove-morir-tenir-targeta-sanitaria.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.