Demandan a o Gubierno britanico que no talle a financiación t’o desenrollo d’a luenga cornica

Londres argumenta que o Consello de Cornualla disposa de mas recursos economicos

Texto en bilingüe anglés-cornico. Foto: Ron Hann (CC-BY-SA 2.0)

Texto en bilingüe anglés-cornico. Foto: Ron Hann (CC-BY-SA 2.0)

Mas de 5.000 personas y una trentena de diputaus han pediu a o gubierno britanico que contine dando emparo economico a o desenrollo d’a luenga cornica. A petición plega dimpués que o departamento de Comunidatz y Gubierno Local haiga comunicau a o Consello de Cornualla que Londres ya no financiará dreitament ista partida.

A financiación d’o gubierno britanico t’o cornico heba plegau a estar de 150.000 libras esterlinas en un anyo. Pero Londres argumenta que, dende l’anyo pasau, Cornualla disposa de mas recursos, dimpués que entrase en vigor un alcuerdo d’ixample d’as atribuciones d’o Consello.

O ministro cornico d’Economía y Cultura, Julian German, ha criticau que “no tiene garra sentiu” que Londres no quiera financiar o desenrollo d’o cornico dimpués d’haber-se compromeso a protecher a luenga en instrumentos europeus como a Carta Europea d’as Luengas Rechionals u Minoritarias. German ha destacau que l’uso d’a luenga heba aumentau os zaguers cinco anyos.

Ha estau presentada una petición oficial en a web d’o parlamento britanico ta que a mida sía reconsiderada. En o momento de zarrar a redacción d’iste articlo, a petición levaba cerca de 5.700 sinyaturas replegadas. Si plega a 10.000, o gubierno será obligau a dar explicacions.

Paralelament, o diputau d’o SNP Angus MacNeil ha presentau una moción en o mesmo sentiu, pedindo emparo ta todas as luengas celticas en cheneral y t’o cornico, “a mas vulnerable”, en particular. Mas de 30 parlamentarios i han dau emparo, sobre tot miembros d’o SNP, pero tamién d’o Partiu Laborista, d’o Partiu Liberaldemocrata y d’o Plaid Cymru.

Fuent: http://www.nationalia.cat/noticia/10777/demanen-al-govern-britanic-que-no-talli-el-financament-per-al-desenvolupament-de-la-llengu

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.