Dende hue y dica o 24 de chunio ‘Arde Madalena’ en a suya XXVI Semana Cultural

Unatro anyo mas, as carreras d'o vico zaragozano d'a Madalena s'emplirán de fiesta, reivindicación y autochestión

cartel-madalena-2013-entrada-web2

Cartel de Sara Chueca Serrano

Hue, viernes 14 de chunio, prencipia a XXVI Semana Cultural d’a Madalena, as fiestas populars y autochestionadas d’iste vico zaragozano. Mientres once días, as carreras, plazas y locals d’a Madalena s’emplirán un anyo mas de goyo, fiesta y reivindicación.

“Baixo o lema: ‘Arde Madalena!’, presentamos una proposa orichinal, autochestionada y combativa, plena d’actividatz treballadas con muito capital humano y pocos diners. D’o día 14 a o 24 de chunio as carreras d’a Madalena arderán en fiestas” sinyalan dende l’Asociación Vecinal d’iste vico, un d’os muitos colectivos y organizacions implicadas en a organización.

Mientres toda a semana tendrán bien present una exichencia unanime en tot o Casco Historico, a obridura d’una 3ª vía excepcional en o Colechio Publico Tenerías, que dé solución a 22 familias sin plaza en “o cole” d’o suyo vico, a Madalena. “Exichencia que se convierte en indignación debant d’a negativa d’a consellera d’Educación, Dolores Serrat, a recibir a una representación de familias afectadas y d’asociacions vecinals” denuncian.

Programación variada y autochestionada

Os actos prencipian ista mesma tarde, a las 17.30 horas, con a tradicional corrida de pollos en a plaza d’a Madalena, organizada por AC Nogará y l’AMPA d’o Colechio Tenerías. A las 20.00 horas a Tabierna A Flama fa l’enguero d’a exposición de fotografía ‘Dónde pongo mis pies’ de Laura Hernández. A la mesma hora pero en Arrebato, una cita imprescindible con o millor hardcore con a banda 24 Ideas. A las 20.30 horas a tabierna La Otra proposa una sesión de Microteatro con microbocau y microtrago con Aliencontrateatro y a suya “Ima… eugenio”.

Ya entrada a nueit, a Coordinadera Antifaixista organiza una verbena enlatada en a plaza d’a Madalena. Y a las 22.00 horas un d’os platos fuertes d’istas fiestas, o IX Cross Nocturno d’a Madalena con salida dende a plaza d’a Madalena, plegada y brenda en o Parque Bruil, organizau por l’Asociación Vecinal d’o vico.

Radio Topo celebra o suyo 20 cabo d’anyo

O sabado, a radio libre zaragozana Radio Topo (101.8 FM) celebra os suyos 20 anyos en as ondas con a “Emisión Radiomadalenera” mientres tot o día con connexions en directo con as actividatz d’a semana cultural y a las 20.00 horas con a Gala 20 cabo d’anyo de Radio Topo en a Vía Láctea.

Dende as 16.30 dica as 20.30 horas a tabierna vechetariana Birosta se convertirá en un mercadet de ropa d’a botiga de Simbiosis. A las 18.00 horas partirá dende a plaza d’Espanya a marcha Ciclonudista 2013. A las 19.00 horas en o Solar d’o Conello empecipiará o Concierto Madalena en Resistencia organizau por o Grupo de Dreitos Civils Zaragoza y o Ret de Refirme a Sin Papers.

Istas son belunas d’as proposas ta iste cabo de semana, pero n’i hai muitas mas que puetz consultar en iste vinclo. Chentas populars, ciclos de cine, actividatz infantils, mosica, teatro, bicicletadas, charradas, tallers y una larga lista de proposas completan un programa atractivo y variau, que tendrá como acto central a tradicional Chera de Sant Chuan, o domingo 23 de chunio en o parque Bruil, y a traca de fin de fiestas o lunes 24.

Una programación autochestionada y organizada por os propios vecins, vecinas y colectivos socials, que cuenta con a colaboración de distintos comercios y entidatz d’o vico

Arde Madalena!

“26 anyos… de rebelión y cachondeu, d’autochestión y solidaridat, chenerando cultura de baldes a la marguin d’o mercau que a tot le mete un pre. En contina crisi, creyando retz, emplindo de vida os nuestros espacios publicos, celebrando a fiesta, ‘rompiendo la pana’. Multiplicando-nos por 26 ta prener as carreras”.

Como dicen as y os organizadors, o cómo femos as cosas ye l’important, porque: “En istos tiempos en os quals o mercau devora tot o que alienta, puede resultar sorprendent que tal fascal d’actividatz y proposas se faigan sin intrés economico, fuyindo de patrocinios comercials y con un modelo autochestionau, colectivo y solidario. Ixa ye a grandeza d’a nuestra Semana Cultural y asinas queremos que siga estando”.

Fuent: http://arainfo.org/2013/06/desde-hoy-y-hasta-el-24-de-junio-arde-madalena-en-su-xxvi-semana-cultural/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.