Denuncian que REE atura aerocheneradors ta creyar necesidat de carbón

As primeras en haber d'aturar-se son as terminas si no s'amenista más enerchia, cosa que seguntes Ecolochistas no se ye cumplindo

15 diciembre, 2011 | Meyo Ambient | Autor: Arredol | Tweet

Aerocheneradors en A Muela (Foto: Willtron)

Ecolochistas en Acción denuncia que Red Eléctrica Espanyola ye aturando a conveniencia aerocheneradors ta favoreixer o carbón. Seguntes a organización REE ha aturau cheneradors de más de 1000 Mw mientres dos horas.

Quan coincide un alto livel de producción eolica y un baixo ran de consumo, puede que se produzca mas electricidat d’a qual  o ret puede absorber, y s’amenista aturar aquellas centrals que, en a practica, se pueden aturar en un corto espacio de tiempo. Iste ye o caso d’os aerocheneradors, pero tamién ye aplicable a las centrals termicas de carbón y de gas.

Dau que as enerchías renovables tienen preferencia ta dentrar en o “pool” horario, normalment a enerchía que reduz a suya potencia en istes casos ye a d’as termicas, dica un minimo tecnico que las permita tornar-se a meter en funcionamiento rapidament, unas horas dimpués, malas que aumente la demanda.

Manimenos, ha ocurriu tot lo contrario: han aturau os aerocheneradors antis que o carbón haiga plegau a ixe minimo tecnico, a qual cosa fa haber malfurriau gran cantidat d’enerchía electrica obtenida de forma limpia, a partir de l’airera.

Ecolochistas en Acción no troba explicación a iste feito, de no estar que i haiga intención de favoreixer os beneficios d’as termicas de carbón, vendendo una electricidat que no habrían d’haber produciu.

Por unatra parte a organización ecolochista remera que istas aturadas ocurren porque existe una tecnolochía, que no se puede regular ni menos aturar en poco tiempo, y que disposa de prou potencia instalada, incompatible con o desembolique d’as enerchías renovables. Ista tecnolochía ye a nuclear, que amás ye perfectament prescindible, dau que en o rechimen ordinario i hai mas de 55.000 Mw – amás d’os 7.700 nuclears – que pueden cubrir la demanda perfectament, si en bell momento as renovables estasen baixo minimos.