Denuncian que s’entrena a policía ta disparar bolas de goma contra os ciudadans

O SUP denuncia en una carta endrezada t'o gubierno l'entrenamiento contra os protocolos y as leis que son tenendo os "antidisturbios"

Dispositivo policial arredol d'o Belén d'a Plaza d'o Pilar o 14N

Dispositivo policial arredol d’o Belén d’a Plaza d’o Pilar o 14N

O SUP (Sindicato Unificau de Policía) ha denunciau en una carta endrezada t’o ministro d’Interior espanyol a vulneración de protocolos cuanto a l’emplego de pelotas de goma y as ordens d’actuación que se son dando t’as Unidatz d’Intervención Policials (UIP), más conoixius como “antidisturbios”.Seguntes iste sindicato en un entrenamiento d’as UIP feito o miercols, a televisión podió grabar como un comisario insistiba a los policías que “caleba estar más contundent” y dició que ixas unidatz yeran prou blandas. En o entrenamiento, tres d’os escudos emplegaus rematoron crebaus por trucazos de pelotas de goma, por lo que o SUP diz que os policías se yeran entrenando ta disparar dreitament contra población y no pas contra a tierra. Resultau de l’entrenamiento estió que ueito d’os policías resultoron ferius en chenullo, clavillar, uello u testiculos.

O sindicato policial opina que isto “ye una barbaridat que preba d’establir practicas d’actuación ilegals y periglosas t’os ciudadans, podendo levar ta penibles conseqüencias tanto con graus lesions fisicas t’as personas como t’o desprestichio d’o Cuerpo Nacional de Policía” y creyen que ista dinamica les amana más “t’a policía franquista que t’a democratica”.

A carta remata con una fura pregunta dreita endrezada t’o ministro “ye vusté y o suyo gubierno buscando un muerto en Espanya, siga ciudadan u policía, que distraiga o ficacio y chustifique actuacions futuras de más contundencia enta qui se manifiesta con o Gubierno suyo?” ta dimpués acusar-le de “calar a miembros d’a suya organización relichiosa en determinaus puesto de treballo t’os que no ha acreditau prou capacidat profesional”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.