Derbi crucial

Oscences y zaragozanos chuegan ista nueit un derbi crucial pa os dos equipos.

Alex Ronco

Ista nueit en o campo de l’AlcoraUesca-Zaragozaz a las 20h chugarán o derbi aragonés d’a Liga Adelante. A Sociedat Esportiva Uesca mirará de fer-se con una victoria que le faiga quedar-se un anyo mes en a categoría, mientres que o Reyal Zaragoza prebará d’acercar-se a os puestos alteros d’a clasificación y clasificar-se pa chugar a Promoción d’Ascenso, ya que a redota d’o dominche pasau le ha deixau difuera de l’ascenso directo y una redota mes le fería meter en periglo mesmo chugar a Promoción. Asinas que, amás d’a gran rivalidat que gosan de tener istos equipos cal sumar tot lo que son chugando-se-ie.
O Uesca arriba en un d’os suyos millors momentos d’a temporada con quatre victorias en os zaguer cinco partius. Anquela, o entrenador d’o Uesca, no podrá contar pa iste partiu con Alexander González que se’n ye iu concentrau con a suya selección, y con o delantero Arruabarrena y o defensa Jesús Valentín, totz dos baixas per lesión. A buena noticia ye que recupera a dos chugadors importants en o esquema d’o equipo azulgrana, a Samu Saiz y Juan Aguilera, recuperaus d’as suyas molestias musculars.
Mientres que o equipo entrenau per Lluis Carreras no ye pasando per un buen momento dimpués d’a redota sufrida en o zaguer partiu contra un rival dreito como ye o Nastic de Tarragona, asinas que os niervols y a tensión serán aseguraus en o equipo manyo. Pa iste partiu Carreras, que habrá de veyer o partiu dende a grada per a suya sanción, tampoco no podrá contar con o zaragozano Vallejo y Culio, ambos baixa per lesión, y con os sancionaus Rico y Javi Ros, con lo que habrá de fer dos cambios en l’once titular, Sergio Gil y Abraham contan con muitas posibilidatz de chugar-ie.
O arbitro pa iste partiu ye Trujillo Suárez d’o comité tinerfenyo. S’aspera o campo pleno, con un granizo ambient y muita rivalidat entre aficions, que le meterán a color que le cal a iste derbi aragonés

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.