Desarticulau en Zaragoza un grupo delincuencial dedicau a o trafico de drogas

Operación “Capuccino”: seis personas detenidas, cinco rechistros practicaus, mas d'un kilogramo de cocaína incautada, y 5.000 euros en efectivo.

Operación Capuccino (Foto: Chefatura Superior de Policía)

Miembros d’o Grupo Iº d’Estupefacients d’a Brigada Provincial de Policía Chudicial de Zaragoza, en o marco d’a Operación “Capuccino”, han desarticulau un important grupo delincuencial perfectament organizau dedicau a la comercialización de diversas substancias estupefacients en a capital aragonesa, y deteniu a seis personas.

A Operación policial s’encetó o mes d’octubre d’o pasau anyo quan se tenió conoixencia que un ciudadano d’orichen italián se yera dedicando a la venda de substancias estupefacients dende un establimiento comercial que rechenta chunto a la suya muller en o vico zaragozano d’o Arrabal, constituindo istes o escalón mas baixo d’o grupo delincuencial investigau, encargaus d’a venda directa a o consumidor (menudeo).

A investigación estió abanzando aconseguindo-se a identificación d’a resta d’os miembros d’o Grupo Criminal, dica plegar a la cabeza d’a mesma en Zaragoza, J.D.M.D., subdito d’orichen colombián y nacionalizau espanyol, qui manteneba os contactos directos con os proveedors en Colombia.

A las suyas ordens directas se trobaba unatra persona encargada d’efectuar as entregas de droga a os clients mas importants asinas como de custodiar-la.

Por unatro costau, o pai y a tía de J.D.M.D. quedaban encargaus d’o “negocio” en Espanya mientres ell se trobaba en Colombia chestionando a importación d’as diferents partidas de cocaína.

Dimpués d’una ardua y laboriosa investigación, os funcionarios policials tenioron conoixencia d’a imminent plegada a la capital aragonesa d’una partida de substancia estupefacient prevista t’o 7 de febrero, concluindo-se con a detención de 6 personas y a practica de quatro rechistros domiciliarios, asinas como d’a fruitería que rechentaba o matrimonio deteniu, an s’han interveniu, entre atros efectos, diversas substancias estupefacients y diners en efectivo.

Como resultau total d’a operación s’han incautau 1.300 gramos de cocaína, 508 gramos de hachís, 2´6 gramos de marihuana, balanzas de precisión, dos vehíclos, asinas como diversos utils y efectos t’a manipulación, distribución y venda d’a substancia estupefacient, y 5.000 euros en efectivo.

Se significa que os agora detenius amaneixeban a ormino acompanyaus de menors d’edat en l’inte d’as transaccions de droga ta asinas privar devantar sospeitas a las autoridatz policials.

Con ista operación policial s’ha aconseguiu desarticular un Grupo Organizau de venda de substancia estupefacient fincada en Zaragoza, y a incautación d’una important cantidat de substancia estupefacient destinada a la venda.

Os detenius pasan hue a disposición chudicial.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.