Descubiertas dos planetas rocosas en a zona habitable d’a estrela Kepler-62

A NASA ha descubierto dos exoplanetas con posibilidatz d'acubillar vida. As planetas son mas grans que no a Tierra y son a uns 900 anyos-luz

exoplanetasO telescopio espacial Kepler d’a NASA ha descubierto dos planetas que tienen una superficie rocosa como a Tierra en a zona habitable d’una estrela, ye decir, a rechión a on ye posible a presencia d’augua liquida. O descubrimiento, anunciau en rueda de prensa por a NASA y publicau en a revista Science, refuerza a teoría de que as planetas rocosas son abundants en a galaxia y, por tanto, que a probabilidat que beluna d’ellas sía habitable ye elevada.

Os astronomos no saben encara si beluna d’istas dos planetas ye realment habitable. Tot o que se sabe por agora ye que orbitan arredol de Kepler-62, una estrela una mica mas chicota y viella que no o Sol situada a uns 900 anyos luz d’a Tierra. O mas gran de totz dos, denominau Kepler-62y, tiene un diametro un 61% mas gran que no a Tierra y una temperatura superficial meya de 3 graus centigraus baixo zero. O mas chicot, situau una mica mas luen d’a suya estrela, tien un diametro un 41% mas gran que no a Tierra y una temperatura mediana de 65 graus baixo zero.

Totz dos son o que os astronomos denominan supertierras, ye decir, planetas prou grans ta poder detectar con os instrumentos d’observación astronomica actuals pero prou chicotz ta tener una superficie rocosa.

O suyo descubrimiento suposa un fito t’a misión d’o telescopio espacial Kepler, meso en orbita en 2009 con l’obchectivo de determinar dica qué punto son abundants as planetas como a Tierra.

Kepler observa 170.000 estrelas en busca d’aquellas a on a luz mingüe periodicament y dimpués torne a aumentar. Quan isto pasa, l’equipo scientifico d’a misión analisa si o fenomeno se debe a o paso d’una planeta que tapa parte d’a luz d’a estrela u unatra causa. D’ista traza, o telescopio ha permitiu descubrir dica a calendata 115 planetas extrasolars y identificar atras 2.740 que son pendients de confirmación.

Os dos nuevos astros presentaus agora son os mas chicotz ya confirmaus que tienen una superficie rocosa y que se troban en a zona habitable d’una estrela. Se suman a atras dos planetas posiblement rocosas descubiertas anteriorment que se troban en a zona habitable d’a suya estrela, Gliese 581-d Gliese 667-CC. Istas dos zagueras, manimenos, son mas grans que no as descubiertas por Kepler y orbitan arredol d’estrelas mas fredas.

As nuevas observacions “contrimuestran que as exoplanetas son muit abundants, incluyidas planetas chicotas en orbitas leixanas y por tanto con temperaturas templadas“, destaca l’astronomo Ignasi Ribas, especialista en planetas extrasolars de l’Instituto de Sciencias de l’Espacio (IEEC-CSIC). “Se va confirmando que as probabilidatz de trobar chemelas d’a Tierra son altas“.

Seguntes os resultaus d’a investigación presentaus a Science, a masa d’a estrela Kepler-62 equivale a un 69% d’a d’o Sol y a suya edat ronda os 7.000 millons d’anyos, debant d’os 4.570 millons que tien o Sol. Si beluna d’as dos supertierras ye habitable, a vida habrá teniu prou tiempo ta amaneixer y evolucionar.

Manimenos, o telescopio Kepler no observa dreitament as planetas que descubre, soque permite deducir a suya existencia por os efectos que tienen sobre a luz d’a suya estrela. Por tanto, os astronomos no saben encara si as dos supertierras tienen en a suya superficie y a suya atmosfera moleculas adequadas t’a vida, como augua, dioxido de carbono y nitrocheno. Proximos telescopios espacials, asinas como investigacions realizadas con telescopios terrestres, observan dreitament planetas descubiertas en zonas habitables ta comprobar si beluna ye habitable u mesmo ye habitada.

Fuent: http://noticies.sirius.cat/2013/04/descoberts-dos-planetes-rocosos-la-zona.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.