Descubren a planeta mas amanada d’a Tierra fuera d’o Sistema Solar

Astronomos descubren orbitando en a nuestra estrela vecina Alpha Centauri B, a planeta exterior a o sistema solar mas amán conoixida

Foto: ESO (Observatorio Europeu Austral)/L. Calçada/N. Risinger

Una colla de scientificos ha feito un nuevo descubrimiento d’una exoplaneta (una planeta que orbita arredol de qualsiquier estrela que no siga o Sol), con a particularidat de que ha estau descubierta en una d’as nuestras estrelas vecinas, Alpha Centauri B, a “nomás” 4,3 anyos-luz d’a Tierra, por o que ye a exoplaneta mas amanada a nusatros.

A exoplaneta tien una masa parellana a la Tierra, encara que no ye en una zona habitable, pues se troba masiau amán d’a suya estrela (mas amán que Mercurio d’o Sol) y existen altas temperaturas y inexistencia d’augua liquida. Tarda 3,2 diyas en fer una vuelta entera a la suya estrela, l’equivalent a 1 anyo en a nuestra planeta. Alpha Centauri B ye una estrela tamién parellana a o Sol, encara que una mica mas freda y chicota.

A investigación ye liderada por Xavier Dumusque (Universidat de Chinevra y de Porto), chunto a Michel Mayor y Didier Queloz (qui descubrioron en 1995 a primer exoplaneta arredol d’una estrela parellana a o Sol). O nuevo descubrimiento astronomico s’ha dau a conoixer en a prestichiosa revista Nature. Os investigadors son treballando en l’Observatorio Europeu Austral (ESO), en l’observatorio de La Silla, en Chile.

Ya s’han descubierto unas 800 exoplanetas confirmadas y 2.300 asperando confirmación d’a suya existencia.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.