Descubren en Teruel repuis fosils d’una loira terrestre de fa 9 millons d’anyos

Trobada una nueva especie de carnivoro, una loira terrestre, en Alfambra

Foto: Gubierno d'Aragón

Foto: Gubierno d’Aragón

O chacimiento mioceno d’a Roma 2 (con una antiguidat d’uns 9 millons d’anyos), situau en o termin municipal d’Alfambra (Teruel), se ye excavando y investigando por un equipo de paleontologos d’a Fundación Conchunto Paleontolochico de Teruel-Dinopolis y d’o Museu Nacional de Sciencias Naturals-CSIC dende l’anyo 2005. Ditas excavacions han proporcionau dende o suyo empecipie un ixambre de nuevas trobadas, entre ells una nueva especie d’equido, Hipparion laromae, u a trobada de mils de coprolitos (excrementos fosils) de hienas que conteneban repuis de polen con que s’ha puesto d’inferir a vechetación que existiba alavez en a zona.

Manimenos, a Roma 2 sigue proporcionando sorpresas increyibles: entre as campanyas de 2010 y 2011 se recuperó mas d’un centenar de uesos fosils d’un carnivoro desconoixiu dica alavez, que ha resultau estar una loira terrestre que l’equipo de paleontologos, liderau por o especialista en carnivoros Manuel Salesa, ha baltizau como Teruelictis riparius. Entre os repuis recuperaus se troban o crapacín, a variella, qualques uesos d’as patas y mesmo o baculo (o ueso que poseyen en o pene muitos grupos de mamiferos y que ha permitiu de saber que os repuis corresponden a un masclo).

Pero o mas extraordinario de tot ye que Teruelictis, pese a estar una loira, no poseyeba garra adaptación pa desplazar-se por l’augua y a suya gosaralla ye mas pareixida a la d’atros mustelidos como as fuinas, que a o d’as loiras actuals. Por ixo os paleontologos infieren que Teruelictis viviría amán d’a marguín, alimentando-se de crustacios, insectos, etc., pero que carecería d’as capacidatz buciadoras d’as suyas primas, as loiras actuals.

O material mas representativo d’ista nueva loira estió presentau por o director cheneral de Patrimonio Cultural d’o Gubierno d’Aragón, Javier Callizo y o director d’a Fundación Conchunto Paleontolochico de Teruel-Dinopolis, Luis Alcalá.

Istes fosils s’exposarán temporalment en a vitrina denominada “Museu Aragonés de Paleontolochía” de Dinopolis. Se tracta d’un espacio creyau a prencipios d’ista temporada pa amostrar os resultaus mas recients y impactants d’as investigacions realizadas con os fosils aragoneses.

Fuent: http://www.cronicadearagon.es/wordpress/?p=44704

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.