Deteniu o tercer sospitoso d’os atentaus de Bruselas

A lo menos 31 personas morioron y 260 resultoron feridas en un atentau ahiere en Bruselas en l'aeropuerto Zaventem y a estación de metro Maalbeek

Presuntos autors d'os atentaus en Bruselas

Presuntos autors d’os atentaus en Bruselas

Dos chirmans fichaus por a policía y un presunto colaborador en os atentaus de París de noviembre han estau identificaus como os presuntos responsables d’os ataques d’o martes en l’aeropuerto de Zaventem, seguntes ha informau a televisión publica francófona RTBF. Os ataques deixoron, por agora, 31 muertos y 260 personas feridas.

Totz dos suicidas de l’aeropuerto serían Khalid y Ibrahim O Bakraoui, totz dos orichinarios de Bruselas. Teneban 30 y 27 anyos respectivament, y antes d’os ataques de París yeran fichaus por os servicios de policía por actos vandalicos. Posteriorment, un d’ells estió vinculau a os atentaus d’a capital francesa dimpués de logar o piso de París en que a celula yihadista preparó os asaltos a la sala Bataclan, o distrito X y o Stade de France.

Amás, Khalid heba logau baixo una falsa identidat a vivienda d’a carrera du Dries en o barrio bruselense de Forest. Allí tenió puesto o pasau 15 de marzo un tiroteyo en que un d’os sospitosos murió y atros dos en fuyoron, entre ells suposadament o cabecilla d’os atentaus, Salah Abdeslam, que fue deteniu posteriorment.

Seguntes os medios belgas, o tercer sospitoso ye Najim Laachraoui, considerau o celebro d’os ataques y que ya yera estando buscau por a suya supuesta vinculación con Abdeslam. A investigación trobó as ditaladas de Laachraoui en un d’os explosivos detonaus en os ataques de París. Se creye que fue o responsable de fabricar istas bombas ta colaborar asinas con Abdeslam. Tiene 24 anyos y en 2013 ya viachó ta Siria.

O taxista que les levó, clau

As autoridatz belgas son dezaga d’a pista d’o tercer presunto terrorista que perpetró os ataques d’o martes contra l’aeropuerto de Bruselas y a estación de metro de Maalbeek. A zaguera pista ye a d’o taxista que levó a os sospitosos ta l’aeropuerto, que dimpués de veyer as imachens distribuidas sobre ellas trucó a la policía y menó a os achents t’o puesto a on les heba replegau: Schaerbeek. Allí fuoron trobaus un artefacto explosivo, productos quimicos y una bandera d’ISIS.

As sospeitas d’o taxista ya fuoron previas. Os suyos pasachers no le permitioron d’aduyar-les con as maletas, a on se trobaban os explosivos que dos d’ells posteriorment detonoron. O que sigue libre ye o que finalment no fació esclatar a carga que le correspondeba.

Fuent: http://www.eldiario.es/internacional/hermanos-identificados-kamikazes-atentados-aeropuerto_0_497650279.html

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.