Deteniu un periodista por publicar o listau d’os fuyidors fiscals griegos.

O dossier estió entregau por a presidenta d'o FMI fa dos anyos a las autoridatz griegas

A policía griega ha aturato iste domingo a lo periodista Costas Vaxevanis por a publicación d’un listau con más de 2.000 nombres d’interpresarios, profesionals y qualques politicos sospitosos de fuyir peitas. O listau estié entregato en 2010 por a directora d’o FMI, Christine Lagarde, quan yera ministra francesa de Ficienda, a las autoridatz d’Atenas y encluyiba os nombres de griegos con cuentas en bancos suizos.

Vaxevanis publiqué o sabado o listau integro en o semanario Hot Doc. Preveyendo que podeba estar aturato, o reportero denuncié que s’iba a producir un intento de silenciar-le: “En cuenta d’arrestar a los fuyidors fiscals y a los ministros que tenioron o listau en as suyas mans, van a prebar d’arrestar a la verdat y a la libertat d’a prensa”.

A las dos d’a tardi, Vaxevanis estié conducito debant d’o fiscal ta declarar y recullir l’acusación de publicar decumentos presonals de caracter privau. Estié meso en libertat con cargos, pero habrá de compareixer debant d’un chuez o luns a las 12 d’o maitín. En albandonar as dependencias d’a fiscalía, o periodista afirmé que no ha aforzato garra lei, ya que no publiqué ni os numeros d’as cuentas corrients ni as cantidatz de diners acomendadas

“Venizelos y Papaconstantinou (ministros de Ficienda en os gubiernos d’o Pasok) haberban d’estar os procesaus, porque ells tenioron o listau y l’amagoron, proteixioron a creminals y no premitioron que l’Estau griego actugase respective a isto”, dicié Vaxevani.

O listau publicau, qu’en as autoridatz no han dito encara que siga o verdadero, cuenta con 2.059 nombres. En ha tres politicos en ell: dos exministros conservadors, un d’ells ya espritau, y un asesor d’o Gubierno d’Antonis Samaras.

A localización d’o listau ha esdevenito en os zaguers meses en un envolicau chuego de desdicius y acusacions en a politica griega. Lagarde rendé os nombres a lo ministro de Ficienda, Yorgos Papaconstantinou, miembro d’o Gabinet d’o Pasok presidito por Papandreu. No se quaterna que Papaconstantinou prenese denguna mida en o respective.

Debant d’as informacions que diciban que o listau s’heba esvaneixito u que dengún sapeba on se’n trobaba, unatro exministro d’o Pasok, Evangelos Venizelos, que s’heba alzato una copia, la rendé a lo Ministerio de Ficienda a primers de 2012. Ni Papaconstantinou ni Venizelos querioron refirmar que’n heba politicos en ixe listau, la qual cosa animé as remors sobre un posible escondimiento.

O ran d’o frau fiscal en Grecia d’entre profesionals y autonomos ye immenso. Tres profesors d’a Universidat de Chicago, dos d’ells griegos, realizoron un estudeo rancando d’as solicitutz de creditos a un banco d’entre 2003 y 2010. Escubilloron qu’as presonas identificadas como profesionals autonomos feban servir lo 82% d’os suyos ingresos declaraus ta pagar os intréses d’os ampres recullius, un porcentache completament irreal.

Os autors d’o estudeo plegoron a la conclusión qu’os profesionals autonomos deixoron d’apocar 28.000 millons d’euros en 2009, la qual cosa suposaba un 31% d’o deficit presupuestario griego d’ixe anyo.

Fuent: http://ww.eldiario.es/economia/Detenido-periodista-publicar-evasores-fiscales_0_62993740.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.