Detenius dos presuntos miembros d’ETA en l’estau francés

As policías francesa y espanyola detienen a Oroitz Gurrutxaga y Xabier Aranburu como presuntos miembros d'ETA en a localidat occitana de Cauna.

En una operación conchunta d’a unidat policial francesa SDAT y d’a Comisaría Cheneral d’Información d’a policía espanyola, han estau detenius ista tardi en a localidat occitana de Cauna, Oroitz Gurrutxaga y Xabier Aranburu como presuntos miembros d’os aparatos militar y de captación d’a organización armada ETA. Seguntes as fuents policials, totz dos iban armaus y han estau detenius en a vía publica mientres viachaban en un auto con matriclas falsas.

Con istas detencions, suman ya quince as personas detenidas por supuesta pertenencia a ETA dende que ista anunciase l’aturada definitiva d’a suya actividat armada o diya 20 d’octubre de 2011. A zaguera operación policial tamién se produció en suelo de l’estau francés en marzo d’iste anyo.

Antiparti, a cucha abertzale ha denunciau as detencions poco dimpués de que ETA anunciase a suya “disposición y voluntat” ta “entablar un dialogo directo” con os Gubiernos espanyol y francés. Comenta que istos “responden con as vacivas midas de siempre” a la nueva situación existent dimpués d’a fin de l’actividat armada d’ETA y claman a Madrit y París a que atiendan “a la mayoritaria demanda social d’Euskal Herria que les exiche que se conviertan en achents proactivos por a paz y as solucions democraticas”.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.