Detenius en Zaragoza y Murcia dos presuntos miembros d’Al-Qaeda

Seguntes a investigación policial, habrían teniu contactos con Al-Qaeda en o Magreb Islamico (AQMI). L'Audiencia Nacional dubda d'a suya relación con ista organización

nm

Foto: Ministerio de l’Interior (http://www.interior.gob.es)

Iste martes han estau detenidas en Zaragoza y Murcia dos personas presuntament relacionadas con una celula radical d’a organización terrorista AQMI (Al-Qaeda en o Magreb Islamico). Seguntes o Ministerio de l’Interior espanyol, o suyo perfil corresponde con as dos personas sospeitosas d’atentar en Boston, un perfil de “lupos solitarios”.

O deteniu de Zaragoza, N. M., viviba en a carrera Florentino Ballesteros d’o vico d’As Fuents y seguntes a investigación yera usuario d’una “plataforma radical islamista” en a que responsables d’AQMI reclutaban candidatos ta unir-se-ie. H.E.J., deteniu en Murcia, yera vinclau con a delinqüencia común y habría puesto contactar con os responsables d’AQMI.

O ministro de l’Interior, Jorge Fernández Díaz asegura que uno d’os detenius heba feito apolochía d’os atentaus de Boston pero no ha precisau si existe relación entre os dos. Se son rechistrando os domicilios d’os detenius y a operación contina ubierta. S’ha contau con a colaboración en a investigación d’as policías francesa y marroquí y se considera que existiban “indicios fundaus”. O chuez de l’Audiencia Nacional Santiago Pedraz ha ordenau as detencions.

hej

Foto: Ministerio de l’Interior (http://www.interior.gob.es)

Manimenos, l’Audiencia Nacional dubda d’a relación d’os dos detenius con Al-Qaeda y d’a relación d’os detenius con os sospeitosos d’os atentaus de Boston, en aspera de nuevos datos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.