Detienen a o diputau d’o PP Santiago Cervera por un supuesto caso de chantache

Recullió un sobre con 25.000 euros que un anonimo heba exichiu a o president de Caja Navarra

O diputau d’o PP en o congreso espanyol Santiago Cervera estió deteniu iste cabo de semana pasau en Pamplona por un supuesto caso de chantache a o president de Caja Navarra, José Antonio Asián, seguntes informa o Diario de Navarra. Cervera estió a persona que recullió un sobre con 25.000 euros que un anonimo heba exichiu a Asián ta no fer publica documentación relativa a la suya entidat. Os achents lo detenioron en o mesmo puesto y quedó en libertat dimpués de declarar debant d’o chuez de guardia. En o suyo blog, Cervera diz que ha estau victima d’un enganyo y asegura que tamién recibió un anonimo que l’emplazaba a replegar en ixe punto bella documentación relativa a Caja Navarra.

Cervera ye diputau d’o PP por Madrit y ha estau rechidor en Pamplona y consellero de Salut d’o gubierno de Nabarra.

Seguntes o Diario de Navarra, o president de Caja de Navarra presentó o pasau 5 d’aviento una denuncia debant d’a Guardia Civil por intento de chantache. Afirmaba que heba recibiu un anonimo que le demandaba 25.000 euros a cambeo de no fer publica información que supuestament l’acusaba d’haber facturau cantidatz importants a Caja Navarra por parte d’o suyo estudiet d’advogaus.

L’anonimo estipulaba que a entrega ocurriría o 7 d’aviento y se fería en un sobre zarrau en una ranura d’una marguin proxima a o Club de Natación de Pamplona. A Guardia Civil establió un dispositivo ta identificar a persona que replegaría o sobre y detenió a Santiago Cervera. O representant d’o PP en as Cortz espanyolas ampró declaración y quedó en libertat.

En o suyo blog, Cervera, da iste lunes a suya versión d’os feitos. Explica que fa uns días recibió un correu que le indicaba que podeba disposar de bella documentación de relevancia chudicial sobre Caja Navarra y que la heba de replegar en ixe puesto. Tamién apunta que quan respondió o correu dicindo que no le pareixeba adequada ista traza de fer-le plegar a información, o servidor le tornó o mensache.

Adhibe que iste domingo yera en Pamplona “por razons familiars” y tenió curiosidat” ta saber si a información s’heba depositau en o puesto que le heban indicau. Estió en o suyo punto, pilló o sobre y amaneixioron bells achents d’a Guardia Civil ta indentificar-lo. Remera que siempre ha estau muit critico con o que ha pasau en os zaguers anyos respective a Caja Navarra y que a qüestión siempre le ha intresau.

“Sin dubda he cometiu una imprudencia y as conseqüencias las podié constatar decamín”, afirma antes de “lamentar muito” o perchuicio que causa a o suyo partiu.

Fuent: http://www.vilaweb.cat/noticia/4063365/20121210/detenen-diputat-pp-santiago-cervera-suposat-cas-xantatge.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.