Dilma Rousseff, apartada d’a presidencia de Brasil

A mayoría d'os senadors da emparo a ubrir un chudicio politico contra a presidenta

Dilma Rousseff. Foto: Agência Brasil (CC-BY 3.0)

Dilma Rousseff. Foto: Agência Brasil (CC-BY 3.0)

Dilma Rousseff ha estau apartada a lo menos entre meyo anyo d’a presidencia de Brasil. L’ha decidiu o senau brasilenyo dimpués d’una chornada maratoniana de votación. D’ista forma, s’ubre o procedimiento de chudicio politico a Rousseff, conoixiu por “impeachment”. D’os uitanta y un senadors, cinquanta y cinco han votau a favor de tumbar a la presidenta. S’acaba, asinas, 13 anyos de gubierno ininterrompiu d’o Partiu d’os Treballadors.

Dimpués de cinco anyos a o frent d’o gubierno, agora se troba forzada a deixar o cargo en mans d’o suyo vicepresident, Michel Temer (Movimiento Democratico Brasilenyo), por l’acusación d’haber manipolau resultaus contables de l’executivo y d’haber ubierto creditos extraordinarios sin haber pediu autorización a o congreso; unas practicas que violan a lei de responsabilidat fiscal. Rousseff ha acusau a Temer de maniobrar ta desbancar-la d’a presidencia. En bell medio d’iste chuego de siellas, as zagueras enqüestas revelan que o 70% d’os brasilenyos quieren nuevas eleccions.

Entre os seis meses proximos, Rousseff habrá de preparar a defensa ta privar d’estar destituida definitivament. Ye previsto que a sesión d’o chudicio politico en o senau se ferá o mes de setiembre.

O proceso contra a presidenta estió empentau meses dezaga por l’expresident d’o parlamento, Eduardo Cunha, d’o Partiu d’o Movimiento Democratico Brasilenyo, que dica fa poco yera aliau d’o Partiu d’os Treballadors de Dilma. A primers de mayo, Cunha dimitió porque o Tribunal Supremo brasilenyo l’heba encausau por haber recibiu sobornos y haber obstruiu a chusticia.

Rousseff plegó en a presidencia de Brasil (2011) con o emparo d’o president anterior, o carismatico Luiz Inácio Lula da Silva. A primers de mandato, a presidenta desfrutó d’altos indices de popularidat. Manimenos, os indices s’han fundiu istes zaguers anyos por o estancamiento d’a economía y toda una serie de casos de corrupción que han afectau a la suya administración.

Fuent: http://www.vilaweb.cat/noticies/dilma-rousseff-apartada-de-la-presidencia-del-brasil/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.