Dimite o primer ministro d’Ucraína

Mikola Azarov diz que lo fa pa 'poder arribar a un alcuerdo politico que permita resolver pacificament o conflicto'

Foto: Wikipedia

Mykola Azarov. Foto: Wikipedia

O primer ministro ucrainiano, Mikola Azarov, ha presentau a dimisión d’o cargo, ‘una decisión presa pa creyar a posibilidat de plegar en un compromís politico que permita de resolver pacificament o conflicto‘, seguntes explica en un comunicau publicau en a web d’o gubierno. O comunicau se difunde o mesmo día que o parlamento ucrainiano debate, en sesión extraordinaria, si deroga as leis que restrinchen o dreito de manifestación.

Azarov diz que ‘entre a confrontación, o gubierno ha feito tot o posible pa aconseguir una solución pacifica a o conflicto, pa empachar o redamamiento de sangre, a ola de violencia y a violación de dreitos civils’. Reconoixe que a situación que vive Ucraína ye una ‘menaza pa lo desembolique social y economico‘ y ‘pa toda a sociedat’, y que isto le ha feito prener midas ‘criticas’, como a de presentar a dimisión. ‘Hue o mas important ye preservar a unidat y a integridat d’Ucraína. Isto ye muito mas important que l’achenda u l’ambición personal. Por ixo he preso ista decisión’, concluye Azarov, primer ministro ucrainiano dende 2010.

Ye incierto como acabará o conflicto, porque si bien a oposición exichiba a disolución d’o gabinet de ministros –conseqüencia d’a dimisión d’Azarov–, contina pedindo que dimita o president Yanukovich y que se convoquen esleccions.

Os disturbios ya s’estendillan dillá d’a capital, Kiev, y os manifestants opositors han ocupau edificios municipals d’una decena de ciudatz; y no solament t’o ueste d’o país, mas proeuropeísta, sino tamién en a zona oriental, tradicionalment con buenos vinclos en Rusia  y an que o president Víktor Yanukovich ha teniu mas emparo.

O conflicto empecipió en noviembre, quan o gubierno decidió de no sinyar l’alcuerdo d’asociación con a UE y, en cambeo, s’ubrió a integrar-se mas con Rusia.

Fuent: http://www.vilaweb.cat/noticia/4169708/20140128/dimiteix-primer-ministre-ducraina.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.