Dimpués d’anyos de luita en Chanovas, o fumo torna a salir por as suyas chamineras

Os vecins y vecinas de Chanovas han aconsiguiu recuperar o edificio de l'antiga escuela. Protestan asinas mesmo d'a falta de compromís d'Endesa y d'os politicos

Fotos: Oscar Espinosa

Fotos: Oscar Espinosa

O pasau sabado, 23 de noviembre, vecins y vecinas de Chanovas rematoron os treballos empecipiaus fa un anyo consistents en a recuperación de l’antiga escuela d’o lugar. “Agora podemos dicir que Chanovas torna a tener un tellau y una chaminera por a on ya sale o fumo, sinyal inequivoco de vida”, afirma Oscar Espinosa, un d’os vecins d’a localidat sobrarbenca.

“Muito nos ha costau, pus no hemos recibiu garra aduya por parte de l’administración, tot ha estau gracias a o esfuerzo voluntario de qualques vecins y amigos que con o suyo treballo y constancia, quasi totz os cabos de semana de l’anyo nos hemos reuniu en o nuestro lugar ta realizar tant dificil quefer. Y antiparte, as donacions economicas que, t’o pago d’os materials, hemos iu replegando de quasi totz os vecins d’o lugar y turistas que entre tot iste tiempo han pasau por allí, y han aportau con o que han puesto”, adhibe agradeixiu Espinosa, ya que “sin a suya aduya brenca d’isto hese estau posible”.

Os y as vecinas recuerdan que “una vez mas somos os lechitimos propietarios os que hemos de dar un trango entabant ta contrimostrar a l’administración que a recuperación de Chanovas ye posible, pareixe que ells no se lo quieren creyer, pero son muitos anyos de luita, que no van a acabar aquí, ya que hemos dau un primer trango de muitos que imos a seguir dando”. Con isto deseyan que l’administración creya tamién en que ye posible y “podamos ir d’a man tornando a dignidat perdida a os nuestros antipasaus con os atropellos que habioron de soportar”.

En iste sentiu, asperan que “d’una vegada” escomencipien as inversions prometidas, as qualas nunca no han plegau, pus as suyas necesidatz son “muitas y variadas”, destacando as mas importants, como un acceso digno t’o lugar con a construcción d’un puent que dé paso a la carretera, as diferents acometidas d’augua, luz, etc. “Como se puede veyer son muitas cosas que se podrían ir fendo china-chana, pero encara no veyemos garra atisbo de reacción por parte d’os nuestros politicos, que siguen prometendo pero sin complir o que prometen”.

Os expedients son en punto muerto, i hai familias que ya tienen contactos con Endesa, pero a muitas atras encara no les han comunicau brenca, a día de hue encara no i hai garra alcuerdo zarrau. “A CHE, nos ha deixau solos en a negociación con Endesa, cosa que no entendemos pues estió l’administración a que nos expropió, habría d’estar ella mesma a que nos tornase o que ye nuestro por chusticia”, lamenta Espinosa.

Ya ye una realidat o prencipio d’a recuperación de Chanovas, “veyer as caras d’a chent, a ilusión que hemos dispertau, l’asperanza de tornar t’o suyo lugar, ye una honor y una responsabilidat ta nusatros, ya que somos seguros que os nuestros antipasaus y os presents serán argüellosos d’o que femos”. “Somos empecipiando… Chanovas vive”, concluye.

Fuent: http://arainfo.org/2013/11/tras-anos-de-lucha-en-chanovas-el-humo-vuelve-a-salir-por-sus-chamineras/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.