Dinópolis amuestra fosils orichinals d’o Tastavinsaurus sanzi

Ye a primer vegada que o publico los podrá viyer

Radio y piet d'o dinosaurio (Foto: D.Ch.A.)

Radio y piet d’o dinosaurio (Foto: D.Ch.A.)

Dende iste chueves Dinópolis ye amostrando t’o publico por primer vegada, nuevos repuis fosils orichinals d’o dinosaurio Tastavinsaurus sanzi, que se adhiben temporalment t’a vitrina “Museu Aragonés de Paleontolochía”, a la fin d’o Museu Paleontolochico de Dinopolis (Teruel). Se i amuestra radio y o piet completo d’iste sauropodo d’o Cretacico.

Os paleontologos d’a Fundación Conchunto Paleontolochico de Teruel Dinopolis excavoron en 2004 os repuis fosils d’iste eixemplar d’a especie Tastavinsaurus sanzi, o sauropodo más completo d’o Cretacico Inferior d’Europa. Iste trobo se publicó en 2012 en a revista scientifica internacional Cretaceous Research por Rafael Royo Torres, Luis Alcalá y Alberto Cobos.

Iste eixemplar de Tastavinsaurus sanzi se trobó en o lugar de Lo Castellar (Gudar – Chabalambre) conoixiu en o mundo scientifico internacional por a importancia d’os suyo chacimientos de icnitas de dinosaurio, quatre d’ells declaraus Bien d’Intrés Cultural.

A gosaralla d’o dinosaurio de El Castellar ye representau más que más por repuis de costiellas, anca, garra de dezaga, un radio y uesos d’a man y o piet. Iste dinosaurio, que vivió fa bells 120 millons d’anyadas, perteneix a la colla fa poco definida d’os Laurasiformes con representants en Europa y Estaus Unius.

D’iste dinosaurio se’n conoixen dos eixemplars: l’un en Penyarroya de Tastavins, que fació que se i metese a siede de Territorio Dinópolis Inhóspitak (a on que s’amuestran os fosils orichinals d’iste dinosaurio trobau en 1996, chunto con a suya replica completa construyida por os paleontologos de Dinópolis); y l’atro eixemplar, o trobau en Lo Castellar y protagonista d’a publicación en Cretaceous Research.

 

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.