Dinópolis presenta en Alemanya información sobre a morfolochía d’o Turiasaurus

Dinópolis sera present en a Trobada de Treballo Entrenacional sobre Biolochía de sauropodos y Chigantismo que a Universidat de Bonn (Alemanya) ha organizau.

Francisco Gascó charrara en Bonn d'o Turiasaurus

A o congreso, que prencipia hue y durará quatre días, asistirán arredol de 40 scientificos especialistas en a materia. D’entre ellos bi será Francisco Gascó, paleontologo d’a Fundación Dinópolis, quala tesis doctoral versa sobre l’anatomia detallada de Turiasaurus riodevensis, o conoixiu como “O Chigant Europeu”.

O treballo que bi presentará Gascó enanta os resultaus obtenius mientras l’estudeo d’as vertebras cervicals de Turiasaurus trobadas en os yacimients de Riodeva por os paleontologos d’a Fundación Dinópolis entre 2003 y 2010.

O programa d’a trobada se trestallará en diferents sesions mientras os quatre dias que durará o congreso. D’ista traza, se tractarán temas como as caracteristicas y distincións d’o chigantismo en dinosaurios Mamenchisauridos, a ontochenia de l’esqueleto axial de l’Europasaurus y os nuevos datos sobre os chigants ibericos por meyo de reconstruccións de Losillasaurus y Turiasaurus, exposición que ferá Francisco Gascó.

A más, en a resta de charradas s’abordará la reproducción, fisiolochía y indices de creximient, l’absorción y dichestión, a respiración, asinas como as funcions d’o cuello d’os sauropodos.

En a sesión adedicada a la respiración d’istos grands colosos, un d’os ponents sera o paleontologo Mathew J. Wedel (Universidat de California, Estaus Unius), ganador d’o premio Paleonturología 06, organizau por Dinópolis y a Fundación Siglo XXI, con un treballo sobre a neumaticidat de l’esqueleto postcranial d’os sauropodos y as suyas implicacións ta la estimación de masas corporals.

Fuent: http://www.comarcas.es/index.php/mod.noticias/mem.detalle/idnoticia.6552/relcategoria./chk.4b73aebd7c81d5e449d2b3720a01dc0d.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.