Disney merca a productora de George Lucas y anuncia nuevos capitols de ‘Star Wars’

O seteno film de 'A guerra d'as galaxias' s'enguerará en 2015

A companyía norteamericana Disney mercará Lucasfilm, a productora fundada por o cineasta George Lucas, por 3.125 millons d’euros. Disney pagará a metat d’o pre en efectivo y emitirá quaranta millons d’accions quan se zarre o tracto. Asinas, o chigant de l’entretenimiento pasará a controlar a productora d’a famosa serie cinematografica ‘A guerra d’as galaxias’, que tendrá un nuevo capitol en 2015.

‘Mientres os zaguers trenta y cinco anyos, un d’os míos grans placers ha estau veyer que ‘A guerra d’as galaxias’ pasaba de cheneración en cheneración’, ha indicau o director, que creyó Lucasfilm en 1971: ‘Agora ye o momento de deixar-la en mans d’una nueva cheneración de directors. Siempre he creyiu que podeba vivir dillá de yo mesmo, y pensé que yera important fer a transición mientres yo estase vivo.’

Disney ya ha anunciau o seteno episodio de ‘A guerra d’as galaxias’ t’o 2015 y ha revelau a intención de rodar-ne un nuevo film cada dos anyos u tres. George Lucas será consultor creyativo y Kathleen Kennedy, actual copresidenta de Lucasfilm, exercerá de productora executiva. Amás, Kennedy pasará a dirichir a productora dimpués de l’adquisición de Disney, que tamién se quedará con os negocios de productos de consumo, animación, efectos especials, audio y postproducción.

Con a compra de Lucasfilm, Disney contina acaparando grans nombres d’a industria de l’entretenimiento. Cal remerar que anteriorment ya heba adquiriu os estudeos d’animación Pixar y un peso pesau d’os debuixos como ye Marvel Entertainment.

Fuent: http://www.vilaweb.cat/noticia/4051695/20121031/disney-compra-productora-george-lucas-anuncia-nous-capitols-star-wars.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.