Disturbios en a inauguración d’a nueva siede d’o BCE en Frankfurt

O colectivo Blockupy heba convocau una manifestación frent a la nueva siede d'o BCE en Frankfurt. A lo menos 350 personas han estau detenidas y decenas feridas

"O capitalismo mata", lema penchau en o BCE hue. Foto: Dokumentationarchiv

“O capitalismo mata”, lema penchau en o BCE hue. Foto: Dokumentationarchiv

Frankfurt d’o Main (Alemanya) s’ha dispertau hue con ulor a fumo, barracalas y disturbios. Hue s’inauguraba a nueva siede d’o Banco Central Europeu (BCE) en dita ciudat. Pa ixo, s’ha quiesto fer un acto con a presencia d’o president de dito organismo europeu, l’italiano Mario Draghi entre atras personalidatz.

O coste d’o edificio, 1.200 millons d’euros, 400 millons mas d’o presupuesto inicial, ye una d’as causas d’as protestas, chunto a las politicas de retalles empentadas por dito banco y a Unión Europea. Os grupos anticapitalistas y antiglobalización convocaus por o movimiento Blockupy acusan a o BCE de favoreixer a os ricos y reprimir a os pobres.

Ya bien luego, a policía antidisturbios alemanya rodiaba con un fuerte dispositivo a nueva siede d’o BCE. Mesmo antes d’escomencipiar a movilización anticapitalista, que ha arroclau a arredol de 10.000 personas, a policía ha cargau contra os manifestants. Istos han respondiu con pedradas y barracalas, pneumaticos, contenedors y mesmo autos de policía blandiaus. A policía ha feito servir gas lacrimocheno y canyons d’augua a presión pa disolver a manifestación frent a o BCE. A BBC britanica fabla de decenas de personas nafradas, entre manifestants y policías, amás d’unas 350 personas detenidas que ya habrían estau liberadas en a suya mayoría.

Draghi, en o suyo discurso inaugural, ha criticau a os manifestants de vez que ha alabau a nueva siede declarando que “proporciona un fundamento sano pa que o BCE logre o suyo mandato d’estabilidat de pres pa totz os ciudadanos d’a zona de l’euro“. Ha anyadiu, sobre o edificio, que “ye un simbolo d’o millor que Europa puede lograr chunta“.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.