Disturbios en Baltimore (EE.UU) por a muerte en custodia policial d’un choven afroamericano

Debiu a os graus disturbios, s'ha decretau toque de queda y estau d'emerchencia. Ya son varias as muertes de personas afroamericanas en arrestos y custodia policial en Estaus Unius

Imachen d'as protestas. Foto: http://www.librered.net/?p=38404 (CC-BY-NC-ND 3.0)

Imachen d’as protestas. Foto: http://www.librered.net/?p=38404 (CC-BY-NC-ND 3.0)

En Baltimore, (EE.UU.) contina a escalada de tensión entre manifestants y policía por o caso d’a muerte en dependencias policials d’o choven afroamericano Freddie Gray. Qualques personas ha estau feridas entre manifestants y policías y una dotzena detenidas en a protesta que se celebró dimpués d’o funeral de Gray.

O Departamento de Policía de Baltimore reconoixió que se cometioron errors de procedimiento en l’arresto, o 12 d’abril, en que o choven sufrió feridas en a medula espinal. As autoridatz reconoixen que no recibió l’atención medica necesaria y seis achents de policía ha estau suspendius. Gray morió o día 19. Se ye realizando una investigación oficial que dará treslau d’os resultaus o venient viernes.

A protesta marchó por a ciudat dica a comisaría de policía a on fue deteniu Gray. Manimenos, s’ha produciu disturbios con ataques a coches de policía, escaparates y asaltos a comercios. Os manifestants aventoron piedras y atros obchectos contra os antidisturbios.

O gubernador d’o estau de Maryland, Larry Hogan, ha decretau o estau d’emerchencia y ha movilizau a la Guardia Nacional (un cuerpo militar d’ambito estatal) debant d’os graus disturbios. L’alcaldesa de Baltimore, Stephanie Rawlings-Blake, tamién ha decretau toque de queda mientres una semana entre as diez d’a nueit y as cinco d’a maitinada.

Se vive meses de tensión entre a comunidat afroamericana y as policías estadounidenses dimpués de diversos casos de muertes de ciudadanos afroamericanos en arrestos y en custodia policial, como os casos de Michael Brown, Eric Garner u Walter Scott, o que aviva una imachen de racismo y brutalidat ent’a policía en a opinión publica.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.