Diya de vaga en as universidatz d’o Reino Uniu

Protestan por a puyada d'1% en os suyos chornals, que consideran insuficient, habendo perdiu un 13% de poder adquisitivo en os zaguers anyos

Piquete en un edificio d'a Universidat Metropolitana de Manchester

Piquete en un edificio d’a Universidat Metropolitana de Manchester

Una semana dimpués d’a vaga cheneral educativa realizada en l’Estau espanyol, en o Reino Uniu yeran convocaus iste 31 d’octubre a la vaga profesors, tecnicos y personal administrativo en as universidatz. Os sindicatos University and College Union (UCU), Unison y Unite, mayoritarios en as universidatz britanicas, convocaban a un diya d’ature pa protestar contra a ufierta de puyada d’1% en os suyos chornals, que no consideran adequada parando cuenta en o retalle d’os chornals en un 13% dende 2008.

Os sindicatos clamaban a la solidaridat d’os estudiants y d’a resta d’a sociedat. Seguntes os sindicatos, o seguimiento d’a vaga ha estau prou gran, con muitos edificios trancaus u con clases canceladas. Tamién fablan de grans muestras de solidaridat d’estudiants y d’atros treballadors y treballadoras que s’han negau a trescruzar as linias de piquete pa entrar en os edificios universitaires amostrando a suya solidaridat.

En qualques ciudatz s’han realizau mitins, concentracions y manifestacions. No i ha habiu incidents mientres a chornada.

Dende fuents institucionals, como as propias universidatz, han fablau d’un refirme a la vaga “no cheneralizau” y con afeccions minimas“. Asinas mesmo, consideran que a mayoría d’o personal d’as universidatz son d’alcuerdo con l’1% de puyada en os suyos chornals debiu “a o dificil periodo que se ye pasando”.

Dende os sindicatos y chent solidaria se destaca que as matriclas universitaires s’han triplicau en istos anyos habendo-ie un superavit en as universidatz de 1.100 millons de libras, a reforma d’as pensions menaza con fer treballar mas por una pensión menor, asinas como l’incremento d’a grandaria d’as clases y d’a carga de treballo pa profesors y profesoras, y claman a la unión entre estudiants, profesors y atros treballadors en defensa d’a educación y contra os retalles d’o Gubierno de David Cameron.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.