Donetsk y Lugansk votan masivament a suya independencia d’Ucraína

As rechions ucrainianas de Donetsk y Lugansk votoron en favor d'a suya independencia d'Ucraína. Donetsk demanda a suya integración en Rusia

Manifestants a favor d'a Republica Popular de Donetsk ocupan un edificio en foto d'archivo. Foto: Andrew Butko (CC-BY-SA)

Manifestants a favor d’a Republica Popular de Donetsk ocupan un edificio en foto d’archivo. Foto: Andrew Butko (CC-BY-SA)

Largas ringleras de chent asperaba ahiere en os colechios electorals d’as rechions ucrainianas de Donetsk y Lugansk pa responder a la pregunta formulada en o suyo referendum d’independencia. A participación estió d’un 79% en Lugansk y un 71,4% en Donetsk. En Donetsk un 89,07% votó a favor d’a independencia, mientres que en Lugansk os votos a favor serían un 96,2%.

O gubierno provisional ucrainiano no reconoixe istas votacions y ahiere ninvió patrullas militars y paramilitars pa prebar de boicotiar as votacions. En Krasnoarmeysk, ciudat de Donetsk, guardias nacionals disparoron a la población civil que asperaba pa exercer o suyo dreito a votar, dimpués d’ocupar bella siede electoral, incluiu o concello. Dos civils morioron y qualques mas personas estioron feridas.

O gubierno provisional de l’autoproclamada Republica Popular de Donetsk ya ha declarau a suya independencia d’Ucraína y ha demandau a la Federación de Rusia a suya integración en a mesma.

“Moscú respecta a voluntat d’o pueblo en Donetsk y Lugansk y aspera que a realización practica d’o resultau d’os referendums siga realizada d’una traza civilizada, sin recurrir a la violencia, a traviés d’o dialogo entre ripresentants de Kiev, Donetsk y Lugansk”, seguntes expresaba un comunicau d’o Kremlin.

Dende a Unión Europea y Estaus Unius se consideró as votacions ilegals y sin garra reconoiximiento a os suyos resultaus.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.