D’os instrumentos tradicionals

Pepín Banzo

Quan charramos de mosica tradicional nos trobamos con tesis que la definen como aquella que s’interpreta con instrumentos tradicionals, entendendo como tals os instrumentos d’uso común documentaus historicament en un aria cheografica u cultural determinada. Pero ista definición no deixa d’estar cargada de polemica mientres no determina quals son as buegas exactas sobre en qué momento se puede considerar tradicional un instrumento y amás en muitos casos para cuenta en una realidat social y territorial feita d’a permeabilidat d’as buegas.

Antis mas a mosica tradicional a la hora de interpretar-la yera supeditada a las posibilidatz que se’n disposaban en cada momento. As personas quan quereban de fer mosica utilizaban en primer puesto o suyo propio cuerpo a traviés d’a voz, palmas, chufletz… etc. y si quereban adhibir atros elementos emplegaban os trastes que teneban a o suyo arredol. Por ixo, os instrumentos que s’emplegaban ta interpretar-la se podeban aconseguir en casa (sartens, almidetz, cullaras, redomas labradas…) u los podeba construir de traza artesanal fendo servir materials vechetals d’a zona (canyas, fusta, cascaras de fruitos, metal, piedra…) u d’animals (huesos, conchas, cuernos, bodiello, piels…). D’isto sabe muito Eugenio Arnao, y sobre ixo fa diversos tallers de construcción, amás de dedicar-lis gran parte d’a casa suya, museo d’instrumentos tradicionals situada en Aguarón.

En qualsiquier caso, cal parar cuenta que a sociedat tradicional tampoco ha estau allena a novedatz, ya que s’han iu incluyindo en o pasar d’os anyos nuevos materials en a fabricación d’istes trastes (plastico, veire, resinas sinteticas…), a utilización d’atras fustas procedents de diversos puestos (ebano, bubinga…) y nuevas tecnicas de construcción mas tecnificadas y mesmo dichitalizadas.

Amás os cambeos socioculturals han influiu de traza notable en incorporar d’atros trastes procedents d’a orquesta clasica (clarinete, violín, contrabaixo.. etc.) u populars (guitarra electrica, baixo, curdión, etc.) atendendo a las propias modas de cada epoca. Cambeos que sin dandalos han favoreixiu o desembolique y a innovación d’o sector.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.