Dos personas declaran en os chudgaus de Chaca por os incidents en Artieda

Continan as declaracions chudicials por as cargas en Artieda. Ya han declarau seis d'os ueito imputaus y asperan o suyo turno os dos que en quedan

Foto: AraInfo

Iste maitín dos personas mas han declarau en os chudgaus de Chaca en relación a os incidents acayecius en Artieda o pasau 10 d’octubre en que a Guardia Civil cargó contra as docientas personas que tallaban a carretera por a que os funcionarios d’a CHE pretendeban acceder ta sinyar actas d’expropiación de tierras en o lugar.

Arriel, militant de Puyalón de Cuchas, y Oscar han ratificau, con matizacions, debant d’o chuez o que dicioron debant d’a Guardia Civil. Os dos imputaus han estau acompanyaus por miembros de l’asociación Río Aragón, que chunto a os imputaus, han desplegau debant d’os chudgaus una pancarta en a que se podeba leyer “A discrepancia no ye delito”, chunto a mensaches en contra de diversos entibos.

Os imputaus se sienten “muit tranquilos” gracias a la gran cantidat de material de vidio y fotografías en os que se les veye en una actitut pacifica, denunciando que “estió una agresión brutal y inchustificada por parte d’a Guardia Civil y instigada por a CHE”. Asinas mesmo no entienden cómo s’imputan a ueito personas quan i heba unas docientas, amás d’imputar d’una traza muit “sesgada” pues no n’i hai mullers y siet son chovens. A o respective y como mida de refirme se presentoron autoinculpacions d’unas 160 personas en o chudgau d’Exeya d’os Cabellers, chudgau que centraliza a instruccción d’o caso, numero que contina creixendo. Os imputaus asperan que a causa siga archivada, encara que a posibilidat la veyen con prou cautela.

Comentan amás que “ye un intento de criminalizar a la oposición a o recreiximiento de Yesa” amás de que preban de “fer pasar a las victimas como verdugos” y que “no i hai diners ta l’entibo y sí n’i hai ta sacar as millors tierras de cultivo d’o lugar d’Artieda en bell meyo d’a recesión economica”.

Con istas dos personas ya son seis as imputadas que han declarau debant d’un chuez, asperando o suyo turno as dos personas que faltan. Se les acusa de delitos d’atentau a l’autoridat, desordens publicos y lesions. Atros que tamién han declarau, en iste caso o lunes en Zaragoza, son os achents d’a Guardia Civil que denuncioron haber sufriu agresions. Manimenos, quince personas d’as que estioron en a concentración o pasau 10 d’octubre resultoron nafradas con parte de lesions debiu a l’actuación d’o cuerpo policial.

O venient sabado 15 en Zaragoza se ferá una manifestación convocada por Río Aragón y COAGRET ta demandar a fin d’ista politica hidraulica por parte d’a CHE y denunciar os feitos d’Artieda asinas como solidarizar-se con os ueito imputaus y as personas agredidas.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.