Dos policías imputaus por a muerte d’un choven que fuyiba en una furgoneta

O pasau viernes moriba en Zaragoza D. M. por disparos d'a policía en prebar d'escapar d'una persecución policial. Os feitos se son investigando

Os policías que o pasau viernes disparoron contra un vehíclo en fuga, y que causoron a muerte a un d’os dos chovens que bi iban, son imputaus por homicidio imprudent, encara que no han estau apartaus d’o servicio, mientres s’investigan os feitos por parte d’o Grupo d’Homicidios. Totz dos policías han declarau que disparoron contra o vehíclo.

D. M., de 28 anyos, adugaba una furgoneta y yera acompanyau d’un amigo, M. G. Seguntes a versión policial, estioron vistos por una patrulla d’a Guardia Civil en o poligono d’Utevo “El Águila” y procedioron a fugar-se sin mas y sin que podesen estar identificaus. A Guardia Civil demandó aduya a la Policía Nacional espanyola y a la Policía Local de Zaragoza mientres a furgoneta d’os chovens se menaba enta l’aeropuerto por a carretera de Garrapiniellos.

Una patrulla d’a Policía Nacional espanyola se posicionó en una rotonda, demandando aduya a un cambión pa que bloqueyase l’acceso chunto a l’auto policial pa aturar a furgoneta. En plegar a furgoneta, encara que dioron l’alto, no fació caso d’os sinyals d’os achents y salió d’a carretera continando por o campo, seguntes a policía, con intención d’enrestir a os achents, por o que quitoron as pistolas y disparoron tres tiros a las ruedas, encara que un d’ells impactó en l’omoplato d’o conductor, D. M., seccionando-le l’arteria subclavia, morindo poco dimpués. A furgoneta aturó en 100 metros. A policía, trobó en a furgoneta un deposito ta almagazenar mas de 500 litros de gasolina con un tubo de goma y un sistema de bombeu casero, encara que tot yera vuedo, por o que sospeitan que iban a furtar gasolina.

Tanimientres, o choven M. G., que acompanyaba a D. M., estió deteniu, encara que ye en libertat con cargos de resistencia, desobediencia y atentau a l’autoridat. A suya versión ye diferent, pues comenta que no yeran furtando como sospeitan as Fuerzas de Seguridat, que o policía no apuntó ent’as ruedas sino que apuntó a l’interior d’a furgoneta y que no preboron d’atropellar a os policías sino que preboron d’esquivar-los. O choven comenta que acompanyó a o suyo amigo que dició que iba a deixar un buyol de combustible en a interpresa a on treballaba de cambionero, pero en estar sorprendius por a Guardia Civil, o choven muerto consideró que no los iban a creyer y que le sacarían a furgoneta, que yera d’o suyo suegro, y decidió de que escapasen d’allí.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.