Duras cargas policials en as manifestacions mineras en Madrit

Tanto de maitins como de tardis, as manifestacions en refirme a os miners y as suyas redoladas rematan con brutals cargas d'a policía espanyola

Foto: Lorien Topemkin

500 autobuses plegoron ahiere en Madrit, plenos de chent venida dende as redoladas mineras y d’atros puntos de l’Estau ta manifestar-se a favor d’a pervivencia d’as redoladas mineras y os suyos puestos de treballo, chunto a os miners que heban plegau o martes dende os suyos lugars en a Marcha Minera a piet.

A manifestación yera prevista a las 11 h. dende a Pza. Colón dica o Ministerio espanyol d’Industria, a tasament 400 m. de l’estadio Santiago Bernabeu. Arredol de bellas decenas de mils de personas s’arroclaban en a salida. A las 11:30 h. encetaba a marcha, en un ambient coloriu y festivo con sinyals tanto d’as esferents cuencas mineras como d’os sindicatos. A cabecera d’a manifestación heba de plegar en un scenario pasau o ministerio, a on os sindicalistas de CCOO y UGT iban a fer os suyos discursos. Manimenos, en o Ministerio d’Industria, rodiau de cletas, prencipió una baralla dimpués de que s’aventasen contra a policía espanyola bells obchectos como botellas de plastico y petardos. Seguntes testigos presencials, como asinas informa AraInfo, policías infiltraus podrían, sin estar iste aspecto confirmau, haber prencipiau os disturbios.

Mientres os sindicalistas fablaban en o scenario, se desembolicaba una baralla en pleno Paseu d’a Castellana, a on a policía espanyola ha cargau con una violencia desmedida y inchustificada, trucando porrazos mesmo a periodistas identificaus u disparando pilotas de goma a curta distancia y dencima de l’altaria reglamentaria. L’espectaclo pareixeba de guerra, ocasionando prous ferius, entre ells, una nina d’once anyadas, agredida por un pilotazo de goma, u atras personas agredidas en a cabeza u por pilotazos de goma.

Tanimientres a chent conteneba l’actuación policial, as cargas se repetiban en a zona d’os autobuses, a o canto d’o Bernabeu, quan a chent iba ta ells ta tornar ta casa. Unatra vegada se tornaban a repetir duras scenas. 8 personas resultaban detenidas en os disturbios y 76 feridas.

En o Congreso d’os Diputaus espanyol s’anunciaban as nuevas retalladas y parte d’os manifestants, chunto a funcionarios, prebaban de rodiar o Congreso, sin exito debiu a la fuerte presencia policial. Manimenos, Rajoy y atros altos cargos d’o gubierno heban de salir escoltaus por a puerta de dezaga.

Pero o diya no remataba astí. De tardes yera convocada por o “Bloque Unitario” atra manifestación a las 19:30 h. dende a Pza. d’Atocha, con una participación menor que de maitins, alazetada en os movimientos “alternativos” madrilenyos y miners y personas d’as cuencas mineras y solidarios que s’heban puesto quedar en Madrit. A  marcha ha transcurriu unatra vegada en un ambient festivo y reivindicativo dica a Puerta d’o Sol a on remataba. En una plaza plena de bit a bot, han fablau miembros d’o “Bloque Unitario” y s’ha rematau entonando o “Santa Barbara bendita”.

Minutos dimpués de zarrar-se l’acto, encara remaniba en Sol parte d’a chent que heba acudiu t’a manifestación, cargando a policía espanyola contra istos y tornando a vivir-se scenas de violencia policial inchustificada y desmedida en o centro madrilenyo, con cargas mesmo a personas que yeran en un estreno en un cine y atras que no teneban cosa a viyer con a manifestación. O centro se convirtió en un contino “chuego d’o gato y o zorz” con chent amedrentada acubillada en bars u botigas y barracalas ardendo en as carreras. Rematoron 9 personas detenidas y 6 feridas.

En atras ciudatz de l’Estau, de tardes se convocoron concentracions urchents contra as retalladas y l’actuación policial, entre ellas Zaragoza u Uesca.

Fotos manifestación de maitins (Fotogracción)

Fotos manifestación de tardes (Fotogracción)

Vidio cargas manifestación de maitins

Vidio cargas de nueitz

Vidio cargas de nueitz

Vidio carga en os cines Callao

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.