Ecce Homo, nuevo icono pop

Daniel Torres Burriel

Ye curioso como, manimenos os telediarios d’Antena 3, as tecnolochías d’a información y a comunicación mos siguen dando eixemplos impagables d’a suya repercusión en a vida d’as personas, alportando muitas veces una riseta quan somos conoixedors de bella noticia.

O caso ya paradigmatico de l’Ecce Homo de Borcha  ye una muestra de libro de cómo a traviés d’os retz socials, especialment de Twitter, bella cosa que hese pasau totalment inadvertiu a uellos d’uns meyos cada vez mas aluenyaus d’a suya audiencia se configura como un feito relevant, d’actualidat, acceptau como tema de conversa y, más que más, que no deixa indiferent a dengún.

Bi ha qui, y l’hemos visto y leyiu, piensan que se tracta d’una aberración y bi ha qui piensa que se tracta d’un nuevo icono pop en pleno sieglo XXI. Y, prou que sí, bi ha qui fan chanzas, mazadas y desplegan tot tipo d’ocurrencias graciosas (unas mas que no atras) sobre l’afer.

O que ye vistero ye que somos, de nuevas, debant d’un feito global que ha situau a Borcha en o mapa d’o mundo, y con ixo a Aragón. Pero no nomás que ixo. Somos una vez mas debant de l’aclapadora victoria d’as personas, descubrindo historias tant humanas como irrelevants, pero con un caire tant desbordantment cutiano que no podemos sino fer-las nuestras.

Y por ixo las compartimos; y por ixo charramos d’ixo; y por ixo prenemos partiu. Y por ixo no ye estranyo que o fenomeno Ecce Homo de Borcha haiga esdeveniu en un feito tant global que s’haiga convertiu en a millor campanya de marketing que hesen soniau os responsables de qualsiquier institución.

O que mas me fa goyo de tot ye que charrando de tecnolochía, no he charrau brenca de tecnolochía..

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.