Echo se para pa acullir a 17ª edición d’o PIR iste cabo de semana

O veterano festival, organizau ista anyada por a Comarca d'a Chacetania, a Diputación Provincial de Uesca y o Concello d'Echo, ferá un homenache a o fotografo Ricardo Compairé

pirTorna o Festival de Mosica y Cultura Pirinencas (PIR), que fa decisiet anyadas ya y que iste anyo se celebrará en a localidat d’Echo os diyas 6 y 7 de chulio. En ista anyada se ferá homenache a o 130 cabo d’anyo d’a naixedura d’o fotografo Ricardo Compairé, naixiu de Villanúa y boticario en Echo. Asinas, respective a iste fotografo, i habrá una exposición con fotografías suyas en 3D y a prochección d’un documental sobre a suya vida, d’Eduardo de la Cruz.

O festival contará, amás d’iste homenache a Compairé, con mercau de productos d’a val, y prou que con a mosica folk de diferents collas de vals pirinencas vascas, catalanas, occitanas y aragonesas. Destaca a presencia de Tirurirus Free (Aragón), que ferá pasavillas por as carreras d’Echo mientres os dos diyas d’o festival, Os Titiriters de Binefar y La Chaminera pa lo publico infantil, a presencia de curdionistas como Roberto Etxeberría y Enrique Ubieto, a mosica y danza de Verd e Blu (Occitania) y Els Astorets del Pirineu (Catalunya), asinas como a presencia d’atras collas como o Palotiau d’Embún, Esbart Cadí de Bagá (Catalunya), o Grupo Santiago de Samianigo u o Grupo Navarro. O festival contará con una gran presencia mosical en a carrera.

Como puntos fuertes d’o festival, as actuacions nocturnas d’o sabado en a carpa d’a colla vasca Kherau a las 0 h. y de l’aragonesa Maut a la 1 h. O domingo se zarrará o festival con as actuacions de Pont d’Arcalís (Catalunya) a las 18 h. y d’o Grupo Val d’Echo a las 19 h. en a Pza. Conde Xiquena.

Amás, se ferá a entrega d’o premio Truco a Jean Passimourt, procedent d’a val d’Ossau, que ha realizau un important treballo en favor d’a cultura y tradicions en o Pirineu occitano.

Manimenos, se troba a faltar, como gosa ocurrir tamién en atros festivals pirinencos, a presencia d’a luenga aragonesa, excluida unatra vegada tanto d’o cartel como d’o programa d’actos.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.