“Ecolochistas en Acción” contra la termica d’Andorra

Demandan que no se prolargue la vida d'a central y que se zarre a escape

Central Termica d'Andorra (Foto: Ecologistas en Acción)

Central Termica d’Andorra (Foto: Ecologistas en Acción)

L’asociación ecolochista “Ecologistas en Acción” ha feito publico un comunicau a on que s’ha amostrau prou critica con a Central Termica d’Andorra (Andorra – Sierra d’Arcos) y con que “os partius mayoritarios quieran prolargar a suya vida industrial”, lo que consideran “de tot incompatible con a luita contra lo cambeo de l’orache y a contaminación ambiental”.

A central termica ha d’adequar as suyas instalacions t’as nuevas directivas europeas que le caldrá cumplir a partir de 2016. Por ixo, Endesa, intepresa propietaria d’a central habrá de decidir entre zarrar-la, podendo funcionar dica 17.500 horas dende 2016), u fer una serie d’inversions d’arredol de 200 millons d’euros, que podría prolargar a vida d’a central bellas decadas, informa Ecologistas en Acción. Endesa podría prener a decisión final ent’a fin d’estianyo.

Debant d’as campanyas que han encetau bells partius ta esfender que contine l’actividat d’a central, d’a que podrían pender dica 400 treballos, Ecologistas en acción, opina que os intreses ambientals son estando sacrificaus debant d’os intreses politicos u partidistas u os economicos d’as grans interpresas.

Os ecolochistas remeran que “o carbón ye o combustible fosil que pior balanz ambiental presienta tanto por a suya gran emisión de contaminants y de CO2, o gas que calienta l’orache, como por o suyo pior rendimiento economico”. Ta iste colectivo “a toda politica creyible contra o calentamiento global de l’orache le cal achiquir a-saber-lo as emisions de CO2 y ta ixo cal sustituyir os combustibles fosils (carbón, gas, petrolio…), que fan iste gas hibernader, por fuents enercheticas esviellables y por un modelo socioeconomico que meta primer o cabidar y a eficiencia enerchetica.

Ecologistas en Acción diz tamién que “o drama laboral d’as comarcas mineras no ha de servir d’excusa ta prolargar mientres decadas a termica más puerca d’Aragón”, y demanda “aduyas publicas que faciliten, ista vegada de verdat, una verdadera reconversión industrial, pero siempre deixando a lo carbón en o suyo puesto más apropiau, baixo tierra”. “Si Aragón preba d’aduyar a la luita contra lo calentamiento global cal zarrar a central termica andorrana”, rematan.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.