Ecologistas en Acción fan balanz d’a chestión de l’augua

Se publica un informe sobre a chestión de l'augua mientres a lechislatura espanyola

Ecologistas en Acción publica un informe de evaluación d’a chestión de l’augua de man d’o Ministerio de Meyo Ambient, Meyo Rural y Marino dende l’anyada 2008 dica 2011. En iste informe sinyala que as decisions presas en ista zaguer lechislatura han suposau un penible trango enta zaga t’o meyo ambient.

Antimás, Ecologistas en Acción  presenta en iste informe una serie de proposas t’a chestión de l’augua en a venient lechislatura. Dau que as eleccions espanyolas son bien amán tamién convida a totz os partius que se i presentan a que las prengan como propias.

Ya en 2008, o prencipio d’a lechislatura estió marcau por una decisión que ha teniu graus efectos en a politica de l’augua, l’achuntar o Ministerio de Meyo ambient con o d’Agricultura. Ista primer mida ha suposau que a chestión de l’augua haiga qeudau supeditada a los intresese agricolas, que son si arredol d’o 80 % d’o consumo d’iste recurso en l’estau.

O informe resalta como a unica modificación important d’a Lei d’Augua no ye estada ta ficar-ie midas que guarancien a sostenibilidat ambiental sino ta imposar de traza de raso autoritario, sin pasar por o Consello Nacional de l’Augua, o Reyal Decreto Lei 12/2011. Ista norma deixa en mans d’os gubiernos de Catalunya, Andalucía y Aragón as competencias en a demba de policía d’o dominio publico hidraulico. Seguntes Ecologistas en Acción, dita mida, antimás d’estar inconstitucional, puet chenerar graus problemas ambientals en a chestión d’o dominio publico hidraulica, asinas como de conflicto entre territorios. Por tot ixo, Ecologistas en Acción desiche a suya derogación.

O informe sinyala, antimás, que a planificación hidrolochica se ye rezagando de traza inadmisible, tanto seguntes a normativa vichent, como dende l’anvista ambiental y social, y antimás os documentos que se son fendo, no paran quasi cuenta con os aspectos ambientals, ni as limitacions d’os recursos.

Ecologistas en Acción reivindica l’aprebación d’os plans hidrolochicos a on que se prengan midas como: l’albandono d’a construcción de grans entibos y trascoles; a vieda d’a creyación de nuevos reganos y l’achique d’a superficie existens en as redoladas a on que bi haiga un deficit hidrico important, dica plegar en una situación d’equilibrio con o recurso esviellable; establir cabals ambientals adecuaus ta totz os cauces y en totz os suyos tramos; a obligatoriedat d’a tarificación volumetrica en o consumo d’augua y a puyada d’os pres actuals de l’augua t’o regano, a lo menos dica cumplir o prencipio de recuperación de costes.

Istos son bells eixemplos d’as principals denuncias y proposas que replega o “Informe d’evaluación d’a chestión de l’augua en a lechislatura 2008-2011”. Denunicas y proposas que Ecologistas en Acción considera que calen ta un cambio en as politicas d’augua que guarancien a sostenibilidat ambiental y social de rios y acuifers.

Fuent: http://arainfo.org/?p=1245

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.