EEUU s’alinia con Israel ta viedar l’estau palestino en a ONU

Brasil demanda, chunto con a mayoria de l'Asambleya l'ingreso de Palestina. Espanya s'alinia con Francia en una solución intermeya

Barack Obama s'adreza a l'Asambleya (Foto: ONU)

Barack Obama s'adreza a l'Asambleya (Foto: ONU)

O president d’EEUU, Barack Obama, ha afirmau debant de l’Asambleya Cheneral d’as Nacions Unitas que a paz en Orient Proximo no plegara fendo alcorces. Obama se referiba asinas a la petición que o president de l’Autoridat Nacional Palestina levara a l’Asambleya y o Consello de Seguridat de la ONU ta que adempribien l’estau palestino como miembro de plen dreito.

Barack Obama, que ya anunció que o suyo gubierno viedaria en o Consello de Seguridat a dentrada de Palestina, s’alinia con os israelis, que demandan nuevas rondas de negociacions con os palestins ta no adebantar en o proceso y continar con a suya politica d’expropiacion de tierras. EEUU y Israel aseguran que en primeras ha de plegar a paz y dimpués, l’estau palestino. Ye chusto lo contrario d’o que esfiende Mahmud Abbas, president de l’Autoridat Nacional Palestina, qui asegura que la paz nomás plegara con un estau palestino que negocie d’igual a igual con os israelís.

Barack Obama con Ban Ki Moon (Foto: ONU)

Barack Obama con Ban Ki Moon (Foto: ONU)

O president francés, Nicolás Sarkozy ha proposau un termino intermeyo. Sarkozy esfiende que s’ubran negociacions en un mes y que en un anyo s’haiga plegau ta un alcuerdo, mientres que Palestina podria dentrar en as Nacions Unitas como estau observador, ta no ubrir feridas. Sarkozy si que ha feito una crida ta que no haiga garra veto en o Consello de Seguridat y s’ha amostrau partidario de plegar a alcuerdos antis d’a reunión d’o Consello. En a mesma linia, siguindo a proposa francesa, ha fablau a ministra espanyola de Afers Exteriors, Trinidad Jiménez. Abbas ha refusau ista solución y contina con a suya intinción de demandar o viernes o ingreso de Palestina.

Mahmud Abbas plegando en l'edificio d'a ONU (Foto: ONU)

Mahmud Abbas plegando en l'edificio d'a ONU (Foto: ONU)

 

Brasil, ha esdeveniu, tanimientres, en o pais vocero d’as aspiracions palestinas. A suya presidenta, Dilma Rousseff, ha asegurado que “ya ye hora que Palestina se siente dentre nusatros” y ha afirmau que a gran mayoria de l’Asamblea d’a ONU, refirma as intincions de Mahmud Abbas de fer dentrar a Palestina como estau de plen dreito.

Una rispuesta a EEUU s’alinia con Israel ta viedar l’estau palestino en a ONU

  1. Antonio Serón Gascón

    Leyendo istas cosas, paras cuenta de que os yankis son es amos de o mundo. Fan y desfan como lis peta.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.