El Baradei dimite, mientres continan os disturbios en Echipto

O país se troba en estau d'emerchencia. Nomás hue ya i hai contabilizaus 149 muertos, seguntes fuents oficials

Protestas a favor d'o expresident Mursi. Foto: Mohamed Elsayed (CC-BY-SA)

Protestas a favor d’o expresident Mursi. Foto: Mohamed Elsayed (CC-BY-SA)

Mohamed El Baradei, vicepresident d’Echipto y premio Nobel d’a Paz, ha renunciau a o cargo. El Baradei ha dito que s’oposa a las accions violentas de hue en O Caire. ‘Presento a dimisión d’o cargo de vicepresident y pido a Dios que preserve o nuestro estimau Echipto de tot o mal, y que cumpla as asperanzas y aspiracions d’o pueblo’, ha dito, en una carta a o president interino d’Echipto. Y ha adhibiu: ‘Os que s’esquiman d’o que ha sucediu son aquells que claman por a violencia, o terrorismo y os grupos extremistas. Tal como sabetz, veyé que i heba vías pacificas pa acabar os enfrontinamientos entre a sociedat y que estioron proposadas y acceptadas pa que nos trahiesen ent’o consenso nacional’. ‘Yera dificil pa yo continar soportando tanta responsabilidat por decisions con as qualas no soi d’alcuerdo y por as conseqüencias que pueden comportar. No puedo estomagar a responsabilidat de fer redamar sangre‘, ha remarcau.

Entremistanto, continan os disturbios entre os opositors en o gubierno actual y a policía y as fuents oficials ya charran de 149 muertos, entre os quals un camara d’o canal Sky News, que ha estau tiroteyau mientres treballaba. Tot ha empecipiau iste maitín, quan un asalto policial a las acampadas de protesta d’os islamistas en O Caire ha causau mas de cient muertos. ‘Os muertos son policías y civils‘, ha dito o portavoz d’o ministerio, que ha dito que encara heba d’arribar mas detalls. Qualques testigos explican que a policía ha feito servir fuego real pa dispersar a os manifestants, agora que a policía lo niega. Como siga, o gubierno ha declarau o estau d’emerchencia entre tot un mes y no se descarta que a tensión contine puyando as venients horas.

Os Chirmans Musulmans avisan que os muertos podrían plegar a bells centenars, mas que mas entre os mils de seguidors d’o expresident Mursi, que se concentraban en as plazas de Rabaa al-Adauiya y Nagda d’O Caire pa exichir a tornada a o gubierno democratico. Dende o golpe d’estau d’os militars, o 3 de chuliol, mas de trecientas personas han perdiu a vida, como minimo.

Fuent: http://www.vilaweb.cat/noticia/4138968/20130814/baradei-dimiteix-mentre-continuen-aldarulls-egipte.html

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.