“El Bergantes no se toca” esfiende a oposición a l’entibo en as Cortz

Os representants d'Auguaviva han presentau antimás as alternativas a l'entibo existents. O gubierno PP-PAR contina esfendendo lo prochecto

Representants d'a plataforma en As Cortes (Foto: El Bergantes no se toca)

Representants d’a plataforma en As Cortes (Foto: El Bergantes no se toca)

Os portavoces de l’Asociación “El Bergantes No se Toca”, que s’oposa a la construcción de un entibo en o río Alcherez (Bergantes en catalán y castellano), en o lugar d’Auguaviva (Baixo Aragón), presentó iste martes as suyas razons t’aturar y descartar l’entibo en as Cortz d’Aragón. Pedro Julián Cucalón y Aitor Clemente amostroron a oposición t’a suya construcción y creyen que ixe refús “tien a suya base en l‘impacto medioambiental, socioeconomico y arqueolochico que tendría”. Antimás esfienden que bi ha alternativas.

Cuanto a l’impacto medioambiental, Cucalón ha remerau que s’afectan “quatre habitat d’intrés comunitario” y que l’entibo se fería en un “espacio natural protechido por o Rete Natura 2000”. Tamién bi habría impacto arqueolochico, ya que “podría trobar-se-ie patrimonio arqueolochico de tres mil anyadas antis de Cristo“. Atras razons t’a oposición son o gran “impacto social y a la vida economica d’o territorio” u a lo “río lo paisache y a redolada”, esferras que consideran antimás irreversibles”. Ta Cucalón, a construcción de grans entibos “menaza con fer esdevenir os ríos en canals fendo desapareixer qualsiquier ecosistema fluvial” y ha demandau que “s’enforten as midas de tipo no estructural contra os engaronamientos”.

L’atro representant de l’asociación, Aitor Clemente, ha esfendiu as alternativas que existen a lo prochecto d’o entibo, como fer “un nuevo aliviadero en l’entibo de Calanda u recreixer o de Santolea, igual como prener midas no estructurals, como recuperar as planas engaronaderas d’o Río Guadalope”. O prochecto d’o nuevo aliviadero “ye de tot viable, no afecta a garra puesto d’o Rete Natura 2000 y o prochecto ya ye redactau, con lo que ye una qüestión de voluntat y no pas tecnica que tire entadebant”.

En a suya intervención, tamién ha criticau a evalución d’alternativas, que ha considerau “parcial ta favoreixer as presas” y a la Confederación Hidrografica de l’Ebro (CHE), qui “no las ha consideradas”. Ta Clemente, a CHE “pareixe que nomás piensa en inchectar formingón por tot“. O portavoz sospeita de “intreses amagaus que fan que no s’estudien a resta d’opcions” y creye que “una d’as verdaderas razons puet estar o doble emplego previsto, ye decir, laminar creixidas y regular cabals d’alportación, lo que no puet fer l’entibo de Calanda”.

En rematando, han demandau a lo Gubierno y la CHE que “aturen y descarten de tot l’entibo y executen as debantditas alternativas, que amilloran a seguridat de l’entibo de Calana y d’as poblacions auguas abaixo”.

En a respuesta, tanto PP como PAR, han esfendiu l’entibo y refusau as alternativas, esfendendo que ixa ye “a millor opción”. Manuel Blasco (PAR) ha anunciau que treballarán por “plegar en un consenso”. D’atra man, toda la oposición parlamentaria ha amostrau a suya solidaridat con os representants d’Auguaviva y o suyo refús a la obra. PSOE, CHA y IU, han criticau a insostenibilidat de l’entibo y a falta de dialogo d’o gubierno, qui no entiende porque no investiga as alternativas presentadas por a Plataforma.

Toda la sesión se puede viyer en http://media.cortesaragon.es/seneca_wsx?id=oai:seneca:grabaciones/2033.

 

Una rispuesta a “El Bergantes no se toca” esfiende a oposición a l’entibo en as Cortz

  1. Pingback: “El Bergantes no se toca” esfiende a oposición a l’entibo en as Cortz | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.