Empecipia un chuicio contra 40 chovens vascos acusaus de perteneixer a Segi

40 chovens son acusaus de perteneixer a Segi, organización chovenil ilegalizada acusada de formar parte d'ETA. Luis Goñi, atro choven vasco, ha estau deteniu en Pamplona de maitinada

Imachen d'o chuicio hue. Foto: http://www.flickr.com/photos/libregetxon/ (CC-BY)

Imachen d’o chuicio hue. Foto: http://www.flickr.com/photos/libregetxon/ (CC-BY)

Quaranta chovens vascos son estando chudgaus dende hue en l’Audiencia Nacional espanyola por perteneixer a Segi, organización chovenil independentista vasca ilegalizada en l’Estau espanyol pero no pas en Francia, a on continaba existindo dica a suya autodisolución en chunyo de 2012.

Os imputaus y imputadas s’han presentau en l’audiencia vestius con camisetas naranchas con o lema “libre” y han inflau globos d’a mesma color, lanzando mensaches en favor d’una solución en o País Vasco y en refirme de Luis Goñi, zaguer choven deteniu ista maitinada en Pamplona. A presidenta d’o tribunal los ha expulsaus d’a sala pa deixar-les entrar de nuevas, con un apercibimiento. A vista ha escomencipiau, encara que quatro d’as chovenas imputadas no se i han presentau.

Os imputaus y imputadas han considerau que o chuicio ye “meter palos en a rueda a un proceso de solucions“, instando a o Gubierno espanyol a fer trangos ent’a paz. Consideran que les son chudgando por a suya actividat politica y insisten en que o proceso contra ells ye un “anacronismo”. Sinyalan que les imputan participar en ruedas de prensa de colectivos no legalizaus. Han afirmau que “aquí no bi ha 40 terroristas, bi ha 40 chovens” y que “somos chovens independentistas de cuchas que defendemos un nuevo modelo politico, social y economico“.

A mayoría d’as personas imputadas admiten haber sufriu torturas por parti d’os cuerpos policials espanyols mientres os interrogatorios en incomunicación dimpués d’as detencions. Os chovens afirman que as acusacions se basan en torturas, baixo as que seguntes os imputaus y imputadas, yeran obligaus a sinyar as declaracions. Entre as torturas, han mencionau mesmo abusos sexuals.

O chuicio se prolargará mientres bell mes, en primeras dica chinero de l’anyo venient.

Luis Goñi deteniu ista maitinada en Pamplona

Luis Goñi ye un choven vasco condenau a seis anyos de prisión acusau de pertenencia a Segi. Fa tres meses decidió d’amagar-se dica que anunció que apareixería ahiere en a Plaza Nabarrería de Pamplona. A las 14:30 h. i acudió, en bell medio d’un muro popular (Aske Gunea, “zona libre”) formau por centenars de personas, como os devantaus en Sant Sebastián u Ondarroa pa evitar a detención d’atros chovens vascos, que prebaban d’empachar que o choven estase deteniu por as Fuerzas y Cuerpos de Seguridat de l’Estau. A Delegación d’o Gubierno en Nabarra ya advertiba que si o choven se presentaba, sería deteniu. Iste muro continó mientres tot o diya y s’acordó de continar de nueitz.

En l’atardeixer, Goñi agradeixió debant d’os medios de comunicación o refirme y a solidaridat d’os manifestants. Declaró que “o feito de convertir a solidaridat en compromís ha deixau claro que a sociedat vasca no ye dispuesta a continuar plegada de brazos veyendo como se levan seqüestraus militants politicos. Hemos optau por a desobediencia. Iste ye o camín que seguiremos“.

Sobre a 1:30 d’a maitinada, a Policía Nacional espanyola entraba en a plaza con a intención de detener a Goñi. Mediant empentons, trucos y porrazos os antidisturbios y miembros d’a Brigada de Información ubriban o muro popular construyiu dica que han puesto acceder t’o choven y ha estau deteniu. A policía ha efectuau dos cargas con pilotas de goma pa dispersar a os concentraus y en l’actuación policial bi ha habiu a lo menos tres personas feridas. Goñi se troba en a prisión de Pamplona.

Una rispuesta a Empecipia un chuicio contra 40 chovens vascos acusaus de perteneixer a Segi

  1. Pingback: Empecipia un chuicio contra 40 chovens vascos acusaus de perteneixer a Segi | AraInfo | Achencia de Noticias d'Aragón

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.