Empresas en luita contra a reforma laboral y a “lei mordaza”

Centenars de personas han respondiu a la convocatoria feita por diversas empresas en luita contra a reforma laboral y a clamada lei mordaza

Cabeza d'a manifestación. Foto: Pablo Ibáñez.

Cabeza d’a manifestación. Foto: Pablo Ibáñez.

Treballadors y treballadoras d’AUZSA, Movistar, BRIF, SARGA, Balay, Telepizza y Educadores en Lucha chunto a os ‘8 de Yesa’, a PAH y o movimiento estudiantil han quitau as suyas reivindicacions ta las carreras de Zaragoza en una manifestación convocada de forma unitaria.

A protesta -emparada por CUT, CATA, SOA, CGT, Intersindical d’Aragón, ISTA, ASSI, OSTA, Partiu Comunista d’os Pueblos d’Espanya, Clase contra Clase, Anticapitalistas, Podemos, Puyalón de Cuchas, Partiu Comunista d’Espanya en Aragón, Marchas por a Dignidat y Purna– ha partiu pasadas as 19.00 horas d’a plaza Aragón y ha plegau dica a plaza d’o Pilar, recorrendo as prencipals carreras d’a ciudat.

Somos en luita contra a destrucción d’o estau de bienestar a o que nos son levando qualques politicos y hue en concreto contra a reforma laboral y a lei mordaza”, declaraba a AraInfo Jorge Puñal d’a BRIF Daroca, un d’os portavoces en a manifestación, que tamién ha recordau o drama d’os desfiuzamientos u os despius en Balay, Alcampo u Tragsa.

Puñal tamién ha meso de manifiesto a inchusticia que “a companyers que cobran 900 euros a o mes, les haiga plegau una pinyora de 1.000”, fendo referencia a las pinyoras imposadas a tres bombers forestals d’a BRIF Daroca, por realizar una protesta pacifica en Uesca en un acto d’a ministra Isabel García Tejerina entre a pasada vaga d’as BRIF.

Por a suya parte, Javier Anadón, president d’o comité d’empresa d’AUZSA, y unatro d’os portavoces, ha expresau que os 104 días de paros parcials en AUZSA son “efecto d’a reforma laboral”. “En 2013 s’imposó un laudo por o qual se produció inaplicación de l’anterior convenio, como les ocurre a atros colectivos”, ha adhibiu.

“Y qué tienen en común istas luitas? Todas lo son contra a represión inchusta, inchusta porque va contra os intreses d’a mayoría d’a población”, afirmaban as empresas en luita en o comunicau leito a la fin d’a manifestación.

En iste sentiu, o treballador d’as BRIF ha subrayau a importancia d’ista manifestación unitaria ya que ye o prencipio d’una unión de colectivos ta “aduyar-nos os uns a os atros”.

Fuent: http://arainfo.org/2016/03/98416/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.