En a devantadera d’Espiello, Carmelo Lisón Tolosana esfiende a necesidat de replegar o patrimonio cultural d’os lugars

Prencipió ahiere en Boltanya a XI edición d'Espiello, Festival Internacional de Documental Etnografico de Sobrarbe con un audiovisual sobre a obra de carmelo Lisón Tolosana

espiello-inauguracion

Carmelo Lisón Tolosana chunto a os directors de l’audiovisual sobre a suya obra y o president d’a Comarca de Sobrarbe. Foto: Espiello

Con l’aragonés Carmelo Lisón Tolosana, pai d’a moderna Antropolochía Social, acompanyau por os directors de l’audiovisual sobre a suya persona, José Carmelo Lisón, Enrique García y Raúl Fernández, prencipió ahiere a oncena edición d’Espiello, Festival Internacional de Documental Etnografico de Sobrarbe, “o millor espiello ta que os documentalistas amuestren os suyos treballos”, tal como indicó o president d’a Comarca de Sobrarbe, Enrique Campo.

Carmelo Lisón Tolosana agradeixió “l’atención y a distinción” que Espiello le ampra en os que calificó como “os míos inicials dandalos cinematograficos, que pasoron fa mas de meyo sieglo”. Remeró cómo por ixa epoca feba as suyas salidas de campo a lugars y lugarons de Galicia y d’atros cantons d’a peninsula, con una camara que encara conserva y un pesau magnetofono. “Quereba replegar tot o que veyeba, imachens expresivas d’o goyo de vivir, d’o sufrimiento y d’o mal, que hue nos pueden fer reflexionar”.

Advogó por a necesidat de “replegar y preservar o patrimonio cultural d’os lugars ta que a chent sepa cómo viviban os suyos debantpasaus porque tot cambea radicalment. En o luengache, por eixemplo, i hai muitos vocablos emplegaus en os lugars que no figuran en o diccionario d’a Reyal Academia y no podemos deixar perder ixa riqueza, mas quan vivimos en uns momentos en os quals tot tiende a la homocheneización. Si queremos entender a os humanos cal conoixer os suyos modos de vida”.

Ahiere de tardes se fació a devantadera d’a exposición ‘Sobrarbe en a mirada’, una muestra de 28 quadros d’arena que proposa un recorriu por os lugars d’ista comarca pirinenca y que son obra d’os alumnos d’o Centro Ocupacional de Boltanya, chestionau por Atades.

En a primera d’as sesions d’Espiello, con a Sección Mayestros, o Palacio de Congresos acullió a mas d’un centenar de personas disposadas a que un anyo mas torne a brilar iste “espiello”.

Fuent: http://arainfo.org/2013/04/en-la-inauguracion-de-espiello-carmelo-lison-tolosana-defiende-la-necesidad-de-recoger-el-patrimonio-cultural-de-los-pueblos/

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.