En una semana prencipia a diversidat cultural y mosical de Pirineos Sur

O Festival Internacional d'as Culturas, mas conoixiu como Pirineos Sur, alcanza a suya XXI edición con artistas d'a talla de Juan Perro, Manu Chao, Julieta Venegas, Emir Kusturica, Bebe u Muchachito Bombo Infierno.

En tasament una semana as auguas de l’embalse de Lanuza prencipiarán a desgranar as mosicas que van ‘En busca d’o sud’, tematica central que iste anyo aborda Pirineos Sur en a suya XXI edición . Unas mosicas que no tienen un sud concreto, se refieren tanto a o punto cheografico, como a o sud imachinario y a o social, y que, entre atros, levarán t’os scenarios de Lanuza y Sallent de Galligo a artistas como Santiago Auserón, Julieta Venegas, Manu Chao, Emir Kusturica, Bebe u Muchachito Bombo Infierno. Primeras grans figuras que compartirán scenario y cartel con chovens y emerchents valors, como Bomba Estéreo, Aragonian u Astillero. Totz ells ferán que istas montanyas d’o norte d’a nuestra cheografía sían d’o 13 a o 28 de chulio, mirando un poquet mas amán d’o sud.

Juan Perro, ye dicir, Santiago Auserón, y a suya Zarabanda serán os encargaus d’encetar o viache surenyo d’os Pirineus. O viernes 13 de chulio en Lanuza será una nueit ta analisar o sud imachinario a traviés d’a sonoridat afro-norteamericana mas proxima a la cultura hispana que buscan Auserón y os suyos mosicos. Os portugueses Terrakota aportarán a enerchía d’a percusión senegalesa, o reggae y os ritmos africanos que forman a base d’a mosica sin mugas que ofreixen.

Dende o sud d’o norte plegará a mejicana Julieta Venegas, una d’as solistas mas reconoixidas en a scena d’a mosica independient de Mejico, y os colombianos Bomba Estéreo, ta completar o primer cabo de semana de Pirineos Sur en o scenario flotant de Lanuza. O sud combativo con una propuesta innovadora y unica, Fábrica de Rimas, con a participación d’artistas de tres continents, L.Y. Flaco (Espanya), H-Kayne (Marruecos) y C15 (Colombia). O sud d’os Pirineus, o sud exotico y o cono sud levarán dica o scenario de Sallent de Galligo a valors emerchents u poco conoixius en o nuestro país, como Aragonian (Aragón), Ethiocolor u Munit y Jörg, apuestas plegadas dende Etiopía, Tutero (Aragón) u Garotas Suecas (Brasil).

O día 20 de chulio, o sud d’Europa alzará a suya voz en bell meyo de l’Auditorio Natural de Lanuza a traviés d’o compositor, arreglista, guitarrista y cantaire andaluz Javier Ruibal y o cineasta serbio Emir Kusturica, que con o suyo The No Smoking Orchestra revivirá en directo bells d’os momentos mas machicos d’a suya filmografía, como Gato Negro Gato Blanco, A Vida ye un Miraglo u O Tiempo d’os Chitans. O sud d’o Mediterranio trahierá a l’archelino Kamel L’Harrachi, un d’os grans actualizadors d’a mosica chaâbi (popular, en arabe) y a os mosicos de Mali, Amadou & Mariam, que con as suyas cantas aconsiguioron enamorar a unatro d’os artistas de l’actual Pirineos Sur, Manu Chao, que produció y colaboró con ells en o suyo quarteno treballo discografico, Dimanche a Bamako, que vendió mas de 500.000 copias en tot o mundo, 300.000 nomás en Francia.

Barry (Marruecos), Astillero (Archentina) y Juju (Gambia/Reino Uniu) proposarán a o publico de Sallent de Galligo un viache por o norte d’o sud, o cono sud y o sud hipnotico, antes de no plegar en a nueit d’o 25 de chulio, en a que Pirineos Sur se tresladará a l’auditorio natural de Lanuza ta ascuitar a mosica global y compromesa de Manu Chao, será una d’as dos unicas actuacions que ufrirá o fundador de Mano Negra iste verano en o nuestro país aintro d’a chira ‘La Ventura’. Os ritmos heterochenios d’o luso-angolenyo Batida, prochecto d’o Dj Mpula aka Pedro Coquenao, en o que combina o tradicional con elementos urbanos, explorando archivos de mosica y imachen d’os 60 y 70, completarán a veilada.

Clorofila, d’o colectivo mejicano Nortec Collective, ferá sonar os suyos “Corridos Urbanos”, nombre d’o suyo zaguer disco, en una nueva nueit adedicada a o sud d’o norte. Pero ista vegada o Festival Internacional d’as Culturas lo ferá conchugando elementos ritmicos y sonicos de mosica nortenya, de banda, con instrumentación y ferramientas d’a mosica electronica.

Pirineos Sur, en a suya recta final, proposa una nueit de mullers d’o sud, con l’archelina Souad Massi, guida d’a nueva cheneración de mosicos d’o suyo país, y a extremenya Bebe, que presentará o suyo zaguer treballo, ‘Un pokito de rocanrol’. A zaguera nueit será adedicada a o sud mestizo, un prochecto de cooperación mosical que iste anyo aborda o Festival, de conchunta con a Diputación Provincial de Uesca, o Festival L’Boulevard de Casablanca (Marruecos) y l’Achencia de Cooperación Internacional dependient d’o Ministerio d’Afers Exteriors y Cooperación. Capitaneyau por o guitarrista flamenco, afincau en Uesca, Manuel Santiago, o prochecto ha uniu a mosicos chitans de Uesca con mosicos marroquís, que s’integran baixo o nombre d’Alquibla, ta fusionar a mosica gnawa con o flamenco. Muchachito Bombo Infierno, Jairo Perera, y a suya contachiosa fiesta de base rumbera zarrarán o venient 28 de chulio a XXI edición de Pirineos Sur que torna a convertir-se en una cita obligada de verano.

Fuent: http://www.aragon2.com/n-19838-705-semana_comienza_diversidad_cultural_musical_Pirineos

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.