Endrecera por as casetas de boveda en a Muela Baixa de Borxa

Totz os participants han puesto fer-se consciens d'a riqueza patrimonial que amaga ista redolada

Una imachen d'a gambada

Una imachen d’a gambada

L’asociacion Senderistas de la Huecha organizó lo pasau sabado 27 d’abril una endrecera por as casetas de boveda de a Muela Baixa de Borxa. Iste recorriu ye o seteno que fa ista anyada 2013 l’activa colla de o lugar de Magallón dentro de o suyo calandario anyal d’endreceras tarabidau en 18 recorrius diferents.

Debant de as antiguas escuelas d’El Buste s’han arroclau una decena de personas bien paradas ta no pasar frío en un maitín d’abril qu’eba amanexiu con una miqueta de nieu en o cobalto d’a Muela. A ruta ha nabesau o costau norte d’a Muela Baxa de Borxa dende an se puede esfrutar d’unas ambiestas singulars d’a Val de l’Ebro, con a huega de Navarra en o cobaxo y o santuario d’a Virchen de Sancho Abarca en l’horizont. Amás, l’abundante plebia d’ista primavera ha feito que tot o paisache siga rebutién de colors verdas y feba más polidas as ambistas. Pero lo feito particular d’ista endrecera ha estau que yera empentada por Pedro Domínguez, un gran conxedor de l’arquitectura popular de a redolada que dende o Centro de Estudios Borjanos fa una faina de rechira y espardidura d’ista parti tan esconoxida de o nuestro patrimonio cultural.

Por ixo, o suyo propio interés yera que amanaba a os caminants ta seis casetas poco conoixidas encara que tradicionals amás d’atros repuis de construccions populars como parideras y arnals. Asinas, bels miembros de o club de senderismo ya eban feito lo camino ta parar a chornada, con un recorriu bien trigau y sin garra dificultat por a chiqueta costera que teneba.

A mayor particularidat d’istas casetas ye que son de boveda, de raso cerculars y feitas nomás que con piedras y un poquet de bardo. O suyo emplego parixe que yera relacionau con os labradors que treballaban en as faxas qu’emplenan iste paisache, ta cubillar-se en ibierno d’o frío y en l’estiu d’a calor u d’as tronadas que i plegan de botiboleyo. Antimás, beluna d’as casetas podeba servir ta cusirar as viñas que bi eba fa tiempo y unatra ye situgada enmeyo d’un gran arnal de a mena clamada “de Monegros”, formau por un gran recinto con gradas an se dixaban os vasos u arnas verticals. L’estau de conservación d’istas casetas yera prou diferent pos beluna yera esboldegrada de raso, belatras presentan un grau periglo d’espaldar-se luego y atras como a de Fuente Escalera y a de Bracicos (a más polida y gran de todas) son perfeutamén conservadas y permiten prexinar cómo yera la vida d’aquellos labradors aragoneses de ya cuasi fa un sieglo.

Totz os participants han puesto fer-se consciens d’a riqueza patrimonial que amaga ista redolada y d’a necesidat de alzar istos chiquetz tresoros espardius entre campos y selvas.
A la fin, 4 horas y meya dimpués d’haber caminau y tramallau entre pistas de buro, pinars y faitius, os caminaires han plegau enta o local social d’El Buste y han charrau con goyo de tot o que eban trobau arredol d’unas bieretas, antis de tornar ta casa suya ta chentar cadagún con a suya familia. S’han prometiu tamién que ista endrezera se mantiendrá l’anyada venient en o suyo calandario anyal de recorrius senderistas.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.