Enrestida d’o gubierno espanyol contra la sanidat, a educación y os meyos publicos

Copago d'os medicamentos, puyada de taxas universitarias y privatización de televisions publicas, entre atras midas

En una rueda de prensa tardana (por a hora en que s’ha feito), a vicepresidenta d’o gubierno espanyol, alcompanyada d’os ministros de Sanidat y Educación, ha feito publica a decisión de l’executivo espanyol d’aplicar nuevas reformas y retalles a la sanidat y a educación.

Por o que fa a la sanidat, a iniciativa d’o gubierno de PP suposa 7.000 millons d’euros d’estalbio en gasto que afectarán, más que más, a pensionistas y usuarios recurrents d’a sanidat publica. A mida aprebada ye o copago (u repago, seguntes os criticos con a mida), que en función d’a renta d’os ciudadans, habrán de pagar o 10% d’o pre d’as medicinas con un maximo d’entre 8 y 18 euros. A ministra espanyola de Sanidat, Ana Mato, ha dito que ista mida quiere meter fin a “os abusos en as prestacions”.

Tamién s’ha reactivau a creyación d’una tarcheta unica sanitaria, y una carta de servicios comuns. Asinasmesmo, a ministra Mato, ha esplanicau que no se dotarán de servicios d’a sanidat publica a os inmigrants nomás con o padrón, sino que habrán de cumplir atros requisitos.

O gubierno aragonés ya dició ista semana, dimpués d’a sectorial de sanidat en a capital d’Espanya, que s’aplicaria o sistema de copago y s’identificaría as tarchetas sanitarias con pegallos en función d’o nivel de renta.

Tamién i habrá reformas en educación, en totz os nivels d’amostranza. O ministro espanyol d’Eduación, José Ignacio Wert, ha presentau un Decreto-Lei que permite a las comunidatz autonomas elevar o numero d’alumnos por aula de colechios y institutos y fer más caras as condutas d’as universidatz publicas, dende o curso proximo, ta complir l’obchectivo de deficit autonomico d’iste anyo, de l’1,5%. A norma encara ha d’estar aprebada por o Congreso espanyol, y ufre a las administracions una serie de posibilidatz ta cabidar 3.000 millons d’euros en o conchunto d’os presupuestos autonomicos, pus cadaguna decidirá qué medidas aplica y cómo, seguntes as suyas necesidatz.

En a educación universitaria, se limita a encorporación de personal de nuevo ingreso y os alumnos de grau y os de máster que habilitan ta exercer una profesión habrán de pagar entre o 15 y o 25% d’o coste real d’a titulación (a meya yera d’o 15% dica agora). Más pagarán encara os repetidors, que habrán d’asumir dica o 30%, y ta os alumnos foranos, que pagarán tota la matricula. En l’amostranza no universitaria, o tope d’alumnos por aula puya o 20%, vinclau a las taxas de reposición de vacantes de funcionarios docents (un 10% en 2012). Dica agora yeran 25 estudiants como maximo en primaria y 30 en secundaria obligatoria. O profesorau d’infantil y primaria habrá de dar a lo menos 25 horas de clase semanalment y 20 en a resta d’amostranzas, sin prechudicio d’a reduccions por l’exercicio de funcions d’adreza u coordinación d’o centro.

A tercera mida important, d’ista reunión de l’Executivo espanyol ye a reforma d’os modelos publicos de meyos de comunicación. Por o que fa a la televisión publica espanyola, o president de l’ente podrá ser nombrado por mayoría absoluta d’o Congreso (en a practica, por o gubierno) y no por as dos terceras partis, como se feba dende a reforma de l’anterior gubierno espanyol. Seguntes a vicepresidenta Soraya Sáenz de Santamaría, ista mida “desbloqueyará o Consello d’Administración que no puede aprebar as cuentas ni fer os achustes que s’amenistan”.

O decreto presentau por o gubierno espanyol premite tamién a privatización d’as televisions publicas autonomicas, como Aragón Tv, que podrán ser ficadas en concursos publicos ta la suya adchudicación por decisión d’os gubiernos d’as comunidatz. En o caso que sigan en mans publicas, habrán d’equilibrar as cuentas, y estarán obligadas a no tener déficit.

En Aragón, a televisión autonomica ye un modelo mixto, de capital publico, pero operada mayoritariament por productoras privadas, pero baixo control d’un ente publico.

 

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.