Entra en vigor a “Lei Mordaza”

A lei, que reforma o codigo penal, ye a saber que refusada por a criminalización d'a protesta ciudadana u as mugas a la libertat d'expresión, entre atras cosas.

Una d'a pancartas d'a manifestacion

Una d’a pancartas d’a manifestacion

Ista nueit ha entrau en vigor a “Lei de Seguridat Ciudadana” conoixida popularment como “Lei Mordaza“, a on que se viedan u se meten pinyoras por actuacions que dica agora no teneban sancions u yeran prou menors y legaliza a cadena pa cutio revisable. “Una lei que castiga a pobreza, a solidaridat y a protesta”, en parolas d’os organizadors d’a manifestación que se fació iste martes en Zaragoza en contra d’ista lei.

A nueva lei s’ha feito de propio contra bella acción prou cutiana en os zaguers tiempos. Ye o caso d’as concentracions pacificas no comunicadas, como as d’o 15M, que dende agora se les podrá meter 30.000 euros de pinyora. As pinyoras serán mesmo mayors si se fan en puestos sensibles como centrals nucleyars u organismos oficials, en clara referencia a accions como la que protagonizó ahiere Greenpeace u iniciativas como “Rodea el Congreso”. Tamién s’ha lechislau en contra d’a desobediencia civil como a que s’ha gosau de practicar por as plataformas en contra d’os esfuizamientos. Cuanto a las personas migrants, a lei fa legal atra mida prou qüestionada en tot lo mundo, mesmo por organismos internacionals y ONGs, como ye a “tornada en calient”. Ixampla tamién, os poders d’os achents de policia que podrán demandar identificacions arbitrariament y retener a qui creigan que no ye adeqüadament identificau por seis horas sin garra razonamiento ni guarencia.

A lei ha estau prou contestada por colectivos y organizacions de toda mena y mesmo o Tribunal Constitucional espanyol ha reflexau dubdas, en admitir a tramite o recurso de inconstitucionalidat presentau contra la lei. Sectors d’o mundo chudicial y d’os cuerpos de policia tamién han criticau a lei, que contó con prou refús en a tramitación parlamentaria. As conseqüencias ya se prencipioron a sentir con o zarre d’a web subtitulos.es chusto antes de entrar en vigor a lei.

Iste martes se celebroron concentracions y manifestacions en as principals ciudatz de l’estau. En Zaragoza, millars de personas marchoron dende a Plaza Paraiso dica la puerta d’a siede d’a Delegación d’o Gubierno espanyol en Aragón, en a Plaza d’o Pilar.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.