Entremistanto, o ministro espanyol Arias Cañete no descarta trescoles

Arias Cañete, amás, ha dito que Biscarrués se licitará antis d'aviento y que Yesa se rematará en 2015

Biel y Arias Cañete han presidiu a comisión d'o Pacto de l'Augua

Biel y Arias Cañete han presidiu a comisión d'o Pacto de l'Augua

O ministro espanyol d’Agricultura y Meyo ambient, Miguel Arias Cañete, no ha refusau hue la posibilidat d’un trescole de l’Ebro enta o sudeste d’a Peninsula Iberica, encara que ha dito que “se rispetará a reserva hidrica de 6.550 hectometros cubicos que marca l’estatuto d’Aragón”. Mientres en as puertas d’as Cortz se concentraban colectivos ecolochistas y vecins de lugars afectaus contra entibos y trescoles, Arias Cañete ha presidiu a comisión d’o Pacto de l’Augua y ha anunciau que antis d’aviento se licitará a construcción de l’entibo de Biscarrués.

Amás, Arias Cañete, ha dito que as obras d’o Pacto de l’augua son “una prioridat ta Espanya” y ye por ixo que tamién ha asegurau que as obras de Yesa estarán rematadas ta par de l’anyo 2015. O recreiximiento de Yesa cuenta en os Presupuestos Chenerals de l’Estau ta 2012 con una partida de decisiet millons d’euros, que en primeras, seguntes Cañete, no van a estar modificaus vía esmiendas, pero sí se ferá una “utilización de repuis” d’o presupuesto, con o compromiso d’enamplar o presupuesto d’iste entibo en diez millons mas, ta obras “dreitament en a presa”. En istes momentos o presupuesto de Yesa ya triplica l’inicial (300 millons), por o que podría plegar dica os 400 u 500 millons, dau que as estructuras previstas han sufriu de quantos problemas en os zaguers anyos por a frachilidat d’o terreno.

A inversión total en as obras d’o Pacto de l’Augua dende que se fació en 1992 ye d’1.365 millons d’euros, que suposa o 41,35% d’a inversión total prevista, seguntes os datos que ha pasau o propio ministro espanyol.

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.