Equador fa una lei pa que garra immigrant pueda estar considerau “ilegal”

Una nueva lei guaranciará os dreitos d'os immigrants y protecherá a os equatorianos migrants en o extranchero

Rafael Correa. Foto: Wilson Dias/ABr - Agência Brasil (CC-BY 3.0)

Rafael Correa. Foto: Wilson Dias/ABr – Agência Brasil (CC-BY 3.0)

Equador deixa de considerar a os immigrants como “ilegals”. Una nueva lei d’aquell país debe guaranciar os dreitos d’as personas migrants dentro d’o país y tamién a protección d’os equatorianos que migren t’o extranchero. Asinas lo dició o sabado pasau o president d’Equador, Rafael Correa, seguntes o que reporta La Jornada.

O president explicó que as politicas gubernamentals favorables a os immigrants no son prou, y que cal una lei que prive que istas midas se puedan derogar en o futuro. En ixe sentiu, ista lei establirá que a migración ye un dreito. A lei debe votar-se en o parlamento d’o país, y ya s’ha asegurau a mayoría absoluta d’os votos. “Garra ser humano puede estar considerau ilegal […], isto ye una barbaridat, ye una aberracion“, sinyaló Correa.

O president aprofitó pa tornar a criticar o tractamiento que reciben os immigrants en Europa. “He visto familias, de ninos d’11 anyos con as suyas mais en prisión por estar ilegals. O suyo estatus podría estar irregular, pero de sers humanos ilegals? Aquí dengún no charra de sers humanos?”, dició.

A nueva lei tamién “guarancia os dreitos d’os extranchers en Equador, d’os que son tornaus, d’os que piden asilo politico, d’os apatridas“. Y amás, a norma reducirá os tipos de visau de diez y ueito a quatro, promoverá l’agrupamiento familiar y a prevención d’a migración de risgo.

Seremos o primer país d’o mundo en tener una lei de mobilidat humana que incluye totz os grupos de personas que son dentro d’ixa situación, y, amás, que guarancie a protección d’os equatorianos en o exterior“, precisó a responsable d’o gubierno sobre os afers de migracions, María Landázuri.

S’estima que cerca d’1,6 millons de personas d’Equador ha migrau ta Europa y t’os Estaus Unius, en busca d’una vida millor. A mayoría marchoron a la fin d’os anyos 1990 a causa d’una crisi muito dura.

Fuent: http://www.jornalet.com/nova/5251/equator-fa-una-lei-per-que-cap-dimmigrant-posca-esser-considerat-illegal?utm_source=dlvr.it&utm_medium=twitter

Deja un comentario

Tu dirección de correo electrónico no será publicada. Los campos obligatorios están marcados con *

Connect with Facebook

Arredol s'alza o dreito de moderar os comentarios que no rispeten os dreitos y libertatz fundamentals. Arredol no ye risponsable, en garra caso, d'as opinions feitas en os comentarios por os lectors.